DILI, 16 fevereiru 2022 (TATOLI)–Governu liuhosi reuniaun Konsellu Ministru (KM) delibera ona hodi autoriza negosiasaun akordu Millennium Challenge Corporation (MCC) no Programme Implementation Agreement (PIA) entre Estadu Unidu Amérika (EUA) liuhosi MCC no Timor-Leste.
Biban ne’e, KM deside atribui poder ba Ministru Prezidénsia Konsellu Ministru, Fidelis Manuel Leite Magalhães, ba negosiasaun no asinatura akordu ne’e.
“Autorizasaun ne’e fó kompeténsia ba ha’u lidera prosesu tomak ba kompaktu, ne’ebé mak Compact Development Team prepara parte tékniku, atubele iha negosiasaun formál ho parte Amérika no Estadu Unidu iha fulan-abríl,” Ministru Fidelis relata hafoin reuniaun ezekutivu, iha Palásiu Governu, kuarta ne’e.
Notísia relevante: Governu aprova proposta aditamentu akordu subvensaun MCC
Portavóz Governu ne’e dehan, prioridade kooperasaun ne’e iha área rua hanesan bee no saneamentu no edukasaun.
“Bee, saneamentu, no drainajen ne’e hanesan komponente ida no edukasaun komponente seluk ida,” nia akresenta.
Foin lalais, Governu delibera ona hodi aprova proposta aditamentu akordu subvensaun no implementasaun ne’ebé selebra ona ho MCC.
Jornalista : Antónia Gusmão
Editora : Julia Chatarina
