DILI, 18 fevereiru 2022 (TATOLI)–Instituisaun Ensinu Superior privadu, Universidade de Dili (UNDIL) hahú ona prosesu inzensaun propina semestre par tinan akadémiku 2021, ba estudante na’in-3.902, ho subsídiu $439.649, ne’ebé Ministériu Finansa (MF) transfere ba konta bankária universidade.
“Ami hahú ona pagamentu propina ba estudante sira tanba ami tenke aselera lalais prosesu ne’e to’o de’it iha loron-90, nune’e tama loron-15 tempu atu prepara relatóriu,” Vise-Reitór UNDIL, Francisco Martins da Silva, informa iha ninia knaar fatin, sesta ne’e.
Notísia relevante: MF realiza pagamentu inzensaun propina faze daruak ba estudante 66.106
Nune’e, prosesu ne’e tama ona faze daruak, ne’ebé osan sei la fó direita ba estudante sira, maibé bainhira halo inskrisaun maka universidade sei uza subsídiu ne’e hodi selu propina estudante sira.
Antes ne’e, MF halo ona transferénsia osan ho montante $5.428.394 ba konta bankária universidade 18 atu kontinua halo pagamentu inzesaun propina faze daruak ba estudante hamutuk 66.106.
Hosi faze dahuluk, totál orsamentu ne’ebé MF transfere ba konta bankária universitáriu nian hamutuk $5.627.537,50, maibé iha semester par ne’e kontinua transfere ho totál orsamentu $5.428.394.
Notísia relevante: MESSK no BNCTL assina akordu Liña Kréditu” Ensinu Superior Kualidade+”
Enkuantu, kona-ba liña kréditu, UNDIL iha ona planu atu hatama proposta hodi husu kréditu $500.000 ba Banku Nasionál Komérsiu Timor-Leste (BNCTL), atu hadi’a edifísiu andár tolu iha kampus sentrál.
“Ne’e ami-nia planu atu hadi’a uluk kampus sentrál no tuir fali mai mak hadi’a fali kampus paralelu tolu UNDIL iha Baucau, Maliana no Aileu,” nia akresenta
Jornalista : Tomé Amado
Editora : Julia Chatarina
