DILI, 21 fevereiru 2022 (TATOLI)-Ministru Justisa Manuel Cárceres, segunda ne’e, relata ona ba Prezidente Repúblika, Francisco Guterres Lú Olo, kona-ba polítika atu implementa lei terras no propriedade hodi emita ona sertifikadu na’in ba rai ba sidadaun sira iha Timor-Leste.
“Prezidente Repúblika hakarak rona informasaun kona-ba progresu oinsá mak ita kria diploma lejislativa atu implementa lei númeru 13/2017 ka lei Terras Propriedades,” Manuel Cárceres, hateten ba jornalista sira hafoin halo enkontru ho Xefe Estadu iha Palásiu Prezidensiál Bairo-Pité Dili.
Notísia Relevante :Reuniaun KM: MJ aprezenta pakote lejizlativa ba implementasaun lei rai
Dekretu lei tolu importante hanesan dekretu lei rejistu prediál, dekretu lei kona-ba informasaun kadestrál no rejime jurídiku atu fó direitu ba sidadaun nasionál sira ne’ebé okupa kleur ona uma ka perumahan Indonézia ne’ebé iha kontratu arendamentu ho Estadu.
“Nune’e ohin informa ba Prezidente Repúblika katak atu implementa lei Terras Propriedade ne’e mak presiza tan dekretu lei tolu,’’ nia hateten.
Diploma rejistu prediál no informasaun kadestrál KM aprova ona no halo ona armonizasaun finál husi Ministériu Prezidensia Konsellu Ministru (PCM,siglá portugés), hodi kontinua haruka ba Gabinete Jurídika Prezidensia Repúblika nune’e Xefe Estadu bele promulga ka veta tuir kompeténsia ne’ebé iha.
Tuir dadus kadastrál hosi rezultadu Servisu Nasionál Kadastru (SNC) ne’ebé rejistu ona númeru parsela rai hamutuk 318,000.00 maibé iha parsela rai 42,000.00 sei iha disputa.
Kona-ba rai sira ne’ebé laiha ona disputa, nia dehan Governu sei emita sertifikadu na’in ba rai hafoin dekretu lei hirak ne’e hetan ona promulgasaun husi Prezidente Repúblika.
Notísia Relevante :Prezidenti Republika Promulga Ona Lei Rai
Jornalista: Nelson de Sousa
Editór : Agapito dos Santos
