DILI, 22 fevereiru 2022 (TATOLI)-Governu liuhosi Autoridade Munisípiu Dili (AMD) no Sekretáriu Estadu Protesaun Sívil (SEPS), evakua ona vítima inundasaun iha área mota Komoro hamutuk 57 ba sentru akollimentu Don Bosco Komoro.
Notísia relevante: Deputadu sira husu Governu aselera planu harii bairru foun
“Akontesimentu ida horisehik ne’e iha postu administrativu tolu; Don Aleixo, Kristo Rei no Metinaru. Don Aleixo ho totál xefe família hamutuk 57 mak ita evakua ona ba sentru akollimentu Don Bosco Komoro ho totál membru família 205, sira hosi suku Komoro, aldeia tolu mak hanesan Moris Foun, Fomentu I no II”, Adjuntu Prezidente Autoridade Munisípiu Dili, António Moniz Calau, ba Tatoli via telefonika, tersa ne’e.
Nia akresenta, postu administrativu Kristo Rei, iha suku Hera ho totál família haat mak uma mota sobu, nune’e mós Eskola Téknika Vokasionál hetan ameasadu.
“Enkuantu, ba postu administrativu Metinaru ita seidauk rona informasaun, tanbá relatóriu seidauk mai”, nia informa.
Hosi ne’e, nia dehan vítima inundasaun Don Aleixo dadaun ne’e iha Don Bosco Komoro, maibé xefe família haat iha postu administrativu suku Hera provizoriamente sira hela ho sira-nia família.
“Hosi akontesimentu ne’e, polítika ita-nia nafatin bandu komunidade ne’ebé kona ona dezastre atu labele fila ba hela tan iha ne’ebá. Maibé, polítika hosi Sekretáriu Estadu Protesaun Sivil ne’e orsida ita haree bele fó sasán konstrusaun ba sira ka labele no fó karik fó hanusa no sira atu ba hela iha ne’ebé”, nia dehan.
Kona-ba regras ema ne’ebé hela iha mota-ninin, nia afirma munisípiu Dili iha regras, katak tuir lei pur-volta metru 50 hosi mota ne’e bandu atu labele hela, maibé komunidade kontinua nafatin hela iha ne’ebá.
Notísia relevante: Governu planeia tau vítima inundasaun iha alojamentu temporáriu
“Agora, ita hein Governu sentrál nia planu atu halo uma ba ita-nia maluk sira ne’ebé hela iha área risku, ne’ebé ita hein katak ida ne’e bele responde komunidade ne’ebé daudaun hela iha área risku”, nia afirma.
Iha sorin seluk, xefe suku Komoro, Eurico da Costa de Jesus, informa komunidade ne’ebé hela iha mota-ninin hamutuk 58, hosi númeru ne’e dadaun ameasadu hotu.
“Uma tolu mak iha risku no 47 monu ona. Ne’ebé, dadaun ne’e ami sentraliza ona sira iha Don Bosco Komoro”, nia katak.
Autoridade lokál ne’e afirma, bainhira to’o tempu udan nia parte sempre halo sosializasaun ba komunidade ne’ebé hela iha mota-ninin atu labele halo uma besik mota-ninin, tanba tuir dekretu lei númeru 33/2018 bandu labele hela iha área risku.
“Maibé, tanba nesesidade ekonomia populasaun barak laiha fatin, entaun sira nain rasik ho hanoin ateru fatin iha mota-ninin no estrada sira hodi halo uma, ida ne’e la’ós ami mak fó autorizasaun”, nia katak tan.
Inácio Soares, abitante suku Komoro hatete tempu pasadu Governu mai haree no infoma ona ba komunidade ne’ebé hela besik mota-ninin atu ses aan hosi fatin ne’e, tanba risku.
“Uluk Governu sira mai haree ona katak labele hela besik iha mota-ninin, tanba fatin ne’e la’ós ita mak hela uluk, maibé fatin ne’e mota nia dalan”, realsa.
Nia hatutan tan: “Ita-nia maluk sira ne’e, mota sobu ona sira-nia uma no Governu muda tiha ba Kampung Baru, hosi ne’e balun mai halo fali uma iha ne’e, entaun horisehik mota tun hodi sobu tan uma balun iha ne’e”.
Inácio Soares haktuir komunidade ne’ebé hela iha mota-ninin uluk la-hela iha ne’e, tanba fatin ne’ebé sira hela daudaun ne’e sira hola fali rai hosi rai nain iha suku Komoro.
Tuir observasaun Tatoli iha terrenu, horisehik udan ho volume ne’ebé maka’as konsege sobu komunidade nia-uma ne’ebé rezulta lakon uma no sasán.
Komunidade sira ne’ebé bee tama sira-nia uma, ohin komesa halo limpeza.
Jornalista : Nelia Fernandes
Editora : Rita Almeida
