iklan

COVALIMA, SEGURANSA

Kampaña eleitorál no ElPres membru tomak PNTL sei asegura

Kampaña eleitorál no ElPres membru tomak PNTL sei asegura

Komandante foun UPM, Superintendente Asistente, Basilio de Jesus. Imajen/Eugénio Pereira

COVALIMA, 22 fevereiru 2022 (TATOLI) – Komandante Polisia Nasionál Timor-Letse (PNTL) Munisípiu Covalima, Superintendente Basílio de Jesus, hateten atu assegura kampaña eleitorál to´o eleisaun prezidensiál, membru polisiál hotu sei fó seguransa hodi garante pás no estabilidade iha rai-laran.

“Ita sei iha formatura jerál fó orientasaun servisu operasaun iha Covalima durante periódu kampaña, hodi prepara membru hotu envolve iha tereñu, ita la iha feriadu hothotu tenke servisu atu asegura kampaña”, dehan Superintendente Basílio de Jesus ba Agência Tatoli, iha Komandu PNTL, Covalima, Santa Rosa,  ohin.

Formatura jerál ne’e , Basilio adianta sei hahú iha segunda, loron 28 fulan ne’e, atu alerta ba membru sira hodi garante seguransa durante kampaña to’o iha eleisaun prezidensiál.

Superintendente Basílio hein katak durante kampaña to’o eleisaun prezidensiál  sei la akontese  disturbiu ruma, nune´e mak komandante estuda hela situasaun iha Covalima.

“Ha’u nia esperansa katak sei la akontese buat ruma, ha’u la’o barak hodi estuda situasaun  iha Covalima, nune´e atu mosu ameasa ruma ha’u bele hatene. Ohin loron la’os tempu  ona atu  konfronta malu maibé tempu atu aplika ita nia demokrasia liuhosi momentu polítika atu hatudu ita nia maturidade polítika no dignidade polítika ba públiku no mundu”, adianta.

Tuir dadus  hosi Sekretariadu Tékniku Administrasaun Eleitorál (STAE) Covalima estatabele sentru votasaun 80 ho estasaun votasaun 92 no eleitór ho totál 47,807.

Jornalista : Celestina Teles:

Editór : Zezito Silva

iklan
iklan

Leave a Reply

iklan
error: Content is protected !!