DILI, 22 fevereiru 2022 (TATOLI)—Kandidatu Prezidente Repúblika 2022-2027, Antero Benedito da Silva, tersa ne’e, marka prezensa iha uma lisan Raimansu, suku Liurai, postu administrativu Aileu-Vila, munisípiu Aileu hodi simu matak malarin atu kompete iha eleisaun Prezidensiál ne’ebé sei realiza iha loron 19 marsu tinan ne’e.
“Mai iha ne’e hodi simu tulun no bensaun ka matak matak-malirin ba ami nia luta. Ami nia luta mak hodi harii Estadu foun ne’ebé libertadór no sei mobiliza Kamada jerasaun foun hodi asume sira nia responsabilidade no misaun istóriku libertasaun maubere,” Kandidatu Antero Bendito hateten liuhosi komunikadu ne’ebé TATOLI asesu.
Notísia relevante: Antero Bendito rejista ona iha TR ho apoiante 6.000-resin
Iha biban hanesan, ekipa susesu kandidatu Prezidente, Fernando Ximenes, hateten hafoin konsulta no halo reflesaun ba luta revolusaun maubere iha 1975, no vizita fatin istóriku sira hanesan foho Maubere iha Laklubar, foho Maubere iha Turiscai, ai Maubere iha Manumera, bee Debu Maubere iha Ermera, ai ru maubere iha Rotutu, no ohin loron, dia 22 Fevereiru 2022, kandidatu Antero Benedito da Silva hamutuk ho nia ekipa susesu mai halo konsultasaun iha lisan Raimansu, Suku Liurai, Aileu,
“Ami nia konsulta hodi tulun fó bensaun matak-malirin ba ami nia luta. Ami nia luta mak hodi harii Estadu foun ne’ebé libertadór, no sei mobiliza kamada jerasaun foun hodi asume sira nia responsabilidade no misaun. Istóriku: libertasaun machete. Luta ba emansipasaun sosiál maubere nian la hotu iha 1999, agora presiza iha luta foun ida, hahú husi otas foun sira. Konsulta lisan Raimansu nu’udar hahú foun ida ne’ebe loloos”, nia akresenta.
Kandidatu Antero Benedito da Silva ‘Slor’, hetan apoiu hosi movimentu Conselho Nacional da Ressurreicao de Maubere (CNRM), husi Komite Esperansa, Movimentu Rosas Mean, Juventude Sosialista Maubere, no Movimento Re-abilitasaun Agrmekolojia Nasionál ka RAENAL. Sorin seluk, hetan apoiu mos husi movimentu progresista.
Notísia relevante: Kandidatu PR na’in-16 dada ona númeru sorteiu iha Tribunál Rekursu
Jornalista: Hortencio Sanchez
Editór : Florencio Miranda Ximenes
