DILI, 22 fevereiru 2022 (TATOLI)-Deputadu husi Partidu Libertasaun Populár (PLP), KHUNTO no Partidu Demokrátiku (PD), ejize ba Governu atu aselera planu harii bairru-foun hodi muda sai vítima dezastre naturál ne’ebé afetadu husi inundasaun iha 2021 no 2022 iha kapitál.
Deputada Partidu KHUNTO, Irene Gonzaga, hateten iha tinan 2021 liubá Ministériu Planu no Ordenamentu aprezenta ona planu kona-ba harii bairu foun ba vítima dezastre naturál iha área Hera, Munisípiu Dili.
Notísia Relevante :Governu Sei Hari Uluk Uma 4.000 Ba Komunidade Dili
“Hakarak husu planu ne’e to’o iha ne’ebé ona, tanba agora ita-nia ema sira sai vítima nafatin nune’e presiza fatin seguru,” nia levanta iha plenária tersa ne’e.
Nia dehan Parlamentu Nasionál apresia ho polítika Governu ne’e, maibé persiza atu aselera nune’e bele salva populasaun sira ne’ebé maka oras ne’e sei hela iha fatin risku hanesan foho lolon, lagoa, mota ninin, no seluk tan iha Dili.
Iha fatin hanesan Deputadu PLP, Nóe da Silva, dehan udan boot ne’ebé akontese iha loron 21 fulan-fevereiru 2022 konsege sobu populasaun nia uma iha área ponte Komoro Dili.
“Komunidade lubuk ne’ebé hela besik iha área refere daudaun evakua ona bá salaun Dom Bosco, nune’e husu nafatin ba Governu atu tau atensaun lalais”, nia hateten.
Nune’e mós Deputada PD, Elvina Sousa Carvalho, husu Governu atu fó apoiu emerjénsia ba família vítima dezastre naturál iha mota Komoro.
Notísia Relevante :MJ identifika fatin tolu re-aloka vítima dezastre naturál iha Dili
Jornalista : Nelson de Sousa
Editór : Agapito dos Santos
