VIQUEQUE, 22 fevereiru 2022 (TATOLI)—Komandu Polísia Nasionál Timor-Leste (PNTL) munisípiu Viqueque sei garante seguransa durante kampaña Eleisaun Prezidensiál to’o votasaun iha loron 19 marsu 2022.
“Ami sei garante seguransa iha fatin realiza kampaña iha munisípiu Viqueque. Tanba daudaun ami halo ona planu operasionál hodi mantein seguransa no alerta ba komandu monitorizasaun patrullamentu iha fatin públiku sira no fatin kampaña,” Komandante PNTL munisípiu Viqueque, Sebastião Quintão Alves, hateten ba Agência TATOLI, iha salaun administrasaun, tersa ne’e.
Notísia relevante: PNTL distribui viatura ba komandu munisípiu asegura kampaña-eleisaun
Nia konsidera, knaar orgaun seguransa importante tebes atu asegura situasaun hotu, ne’ebé PNTL Viqueque sei koloka membru tuir kaléndariu hosi Komisaun Nasionál Eleisaun (CNE, sigla portugés).
“Ami simu ona kalendáriu no ami sei tau atensaun másimu hodi kontrola movimentu hotu,” nia akresenta.
Estasaun votu iha Viqueque iha 92 , ne’ebé kada estasaun sei koloka membru Polísia na’in-rua.
“Membru efetivu iha munisípiu Viqueque hamutuk na’in-140. Ha’u hato’o tan pedidu ba Komandu Jerál atu aumentu tan membru hosi Kontinente Jerál hamutuk na’in-98 hodi reforsa seguransa iha rejiaun ne’e,” Komandante ne’e tenik.
Aleinde ne’e, Komandu PNTL munisípiu Viqueque halo mós koordenasaun FALINTIL-Forsa Defeza Timor Leste (F-FDTL) no Batallaun Orden Públiku (BOP) hosi Baucau, hodi delega ekipa apoiu serbisu durante kampaña eleitorál.
“Kololakasaun ekipa F-FDTL no BOP mai munisípiu ne’e ha’u seidauk hatene membru na’in hira, maibé ita fiar katak sira sei mai fó apoiu segurasa,” nia otimista.
Jornalista : Vitorino Lopes da Costa
Editora : Julia Chatarina
