Timor-Gap sei halo levantamentu dadus iha zona dezignadu projetu LNG Beaço
COVALIMA, 22 Fevreiru 2022 (TATOLI) – Timor-Gap organiza reprezentante komunidade task forse LNG Beaço halo vizita komparativu iha Munisípiu Covalima, ho objetivu atu halo levantamentu dadus ba rai no propriadade iha área dezignadu Projetu LNG Beaço.
“Ohin lori ita nia reprezentante komunidade LNG Beaço mai vizita hodi haree direta uma ne´ebé afetadu no oinsa atu muda, oinsa modelu uma foun konstrui ba ita nia komunidade no oinsa rate sira ne’ebé afetadu iha Aero-portu Suai”, Diretór ba projetu tasi mane, Francisco Ferreira, ba jornalista sira, iha Hotél vida nova, Bairro-Costa, ohin.
Iha vizita ne’e reprezentante komunidade Beaço, hasoru direta komunidade afetadu ba projetu tasi mane iha Covalima no haree besik liu progresu dezenvolvimentu liga ba prosesu levantamentu dadus, hanesan uato-estrada Aerportu Suai, Suai suplay hodi bele halebar informasaun ba komunidade.
Xefe Suku Maluro Beaço, Francisco Amaral, informa ekipa ne’ebé mai vizita iha Covalima hanesan matadalan ba komunidade sira hosi komunidade afetadu projetu LNG Beaço iha Munisípiu Viqueque.
Reprezentante komunidade Beaço haree kondisaun direta komunidade afeitadu ba projetu tasi mane iha Covalima, nune’e fahe informasaun ba komunidade sira, iha Suku Maluru, Postu Administrativu Viqueqeu no Munisípiu Viqueque.
“Ami haree kondisaun Governu prepara fatin ne’ebé dignu ba ita nia komunidade ne’ebé afetadu ba projetu tasi mane iha Covalima”, katak
Vizita komparativu ida-ne’e, hanesan konkretizasaun husi diálogu entre Governu no komunidade Beaço ne’ebé asina mós akta deklarasaun husi komunidade área dezignadu Planta LNG Beaço hodi retira hikas proposta ne’ebé hato’o ba Governu iha tinan 2019.
Akta deklarasaun ne’ebé komunidade asina hodi entrega hikas rai no propriedade ba Governu liuhosi Ministériu Petróleu no Minerál–Timor Gap hodi jere ba interese nasionál tuir lei ka rezolusaun Governu ne’ebé aplika ona iha projetu tasi Mane seluk hanesan iha Suai no Betano.
Timor-Gap lori repezentante komunidade Task forse LNG vizita fatin sira hanesan, rate foun lokaliza iha Suku Labarai, Aldeia Holbelis, Aeroportu Internasionál Kay Rala Xanana Gusmão no perfurasaun poso liu-rai.
Enkuantu, Timor-Gap mak kompañia Petroleo Nasionál Timor-leste ni’an ne’ebé estabelese ona iha tinan 2011. Bazea ba dekretu lei númeru 31/2012 ho ni-nia objetivu prinsipál mak reprezenta Estadu atu halo negosíu oi-oin iha setór mina rai no gas ni’an. Ninia atividade kobre hosi rai-maran to’o tasi laran hosi nível nasionál to’o Internasionál.
Jornalista : Celestina Teles
Editór : Zezito Silva
