VIQUEQUE, 22 fevereiru 2022 (TATOLI)-–Diretór Servisu Ministériu Agrikultura no Peska (MAP) iha munisípiu Viqueque, Carlos Pinto, informa, tratór boot iha munisípiu Viqueque iha 39, maibé hela 12 maka ho kondisaun di’ak no operasionaliza iha postu lima.
“Tratór boot hamutuk 39 maibé tama leilaun neen, ho kondisaun a’at hamutuk 15. Kondisaun tratór boot ne’e, ninia mákina moris halai di’ak, maibé atu ba fila rai labele tanba balun tasu laiha,” Diretór servisu munisipál ne’e informa ba Agência TATOLI, iha ninia knaar fatin, Beloi, tersa ne’e.
Notísia relevante: Tratór 56 tama ona lista patrimómiu Estadu atu halo leilaun
Ba kestaun ne’e, servisu munisipál husu ona pesa balun ba nasionál maibé presiza loke konkursu.
“Kada tinan MAP nasionál halo manutensaun ba tratór boot. Hosi tratór boot 12 ne’e, ami koloka ba postu tuir proposta ne’ebé haruka mai. Postu administrativu ida-ne’ebé ninia proposta maka tama uluk mak haruka tratór boot rua”, nia hato,” nia akresenta.
Antes ne’e, MAP Viqueque haruka pedidu manutensaun tratór 27 ba nasionál hodi halo manutensaun, maibé to’o agora sira seidauk halo manutensaun.
Jornalista : Vitorino Lopes da Costa
Editóra : Julia Chatarina
