DILI, 23 fevereiru 2022 (TATOLI)– Xefe Estadu Maior Jenerál FALINTIL-Forsa Defeza Timor-Leste (F-FDTL), Tenente Jenerál Falur Rate Laek, deklara F-FDTL preparadu ona hodi fó apoiu ba PNTL atu asegura seguransa durante kampaña to’o eleisaun prezidensiál bainhira Governu husu atu fó apoiu.
“Seguransa ne’e polisia mak halo maibé bainhira diretiva ruma mai hosi Governu atu ami partisipa hodi fó apoiu prontu,”Falur Rate Laek, hateten hafoin halo enkontru ho Prezidente Repúblika, Francisco Guterres Lú Olo, iha Palásiu Prezidensiál Bairo-Pité Dili, kuarta ne’e.
Notísia Relevante :Kampaña eleitorál no ElPres membru tomak PNTL sei asegura
Maske besik ona data kampaña eleitorál husi Kandidatu Prezidente Repúblika hamutuk ema na’in 16, maibé to’o ohin, instituisaun F-FDTL seidauk simu diretivu ruma husi Governu atu reforsa PNTL hodi fó seguransa ba povu.
Iha sorumutu ne’e, Xefe Estadu Maiór Jenerál FALINTIL-Forsa Defeza Timor-Leste (F-FDTL) ne’e relata mós ba Prezidente Repúblika kona-ba mudansa estruturál husi komandu to’o baze ne’ebé lao hela iha iha Instituisaun F-FDTL, asegura seguransa iha eleisaun no asuntu seluk tan.
Daudaun ne’e, nia informa FALINTIL-FDTL iha ona membru efetivu hamutuk ema na’in 2.000,
“Xefe Estadu nia mensajen ba forsa armada hotu tenke kumpre disiplina manten Estadu operasionál no kontrolu hosi irárkia iha baze tenke funsiona,”nia hateten.
Notísia Relevante :PNTL distribui viatura ba komandu munisípiu asegura kampaña-eleisaun
Jornalista: Nelson de Sousa
Editór: Agapito dos Santos
