DILI, 23 fevereiru 2022 (TATOLI) – Vise Ministru Administrsaun Estatál (MAE), Lino de Jesus Torrezão, husu ba Konsellu Administrasaun Fundu Infraestrutura (KAFI) atu aselera hodi anunsia konkursu públiku ba implementasaun projetu Bairo-Foun ba abitante sira iha fatin risku dezastre.
“Ba oin ita tenke aselera prosesu loke konkursu atu kompañia sira bele konkore hodi bele implementa ona. Maibe Konsellu Administrasaun Fundu Infraestrutura (KAFI) nia kompeténsia tanba ne´e tenke anunsia ona”, hateten Lino ba TATOLI, via telefone, ohin.
Lino rekorda katak bazea ba formaláriu ne’ebé mak MAE fahe ba autoridade lokál sira iha Dili atu halo levantamentu, ne´e hotu ona, tanba servisu konjunta entre Sekretáriu Estadu Protesaun Sivíl (SEPS) no Ministériu Planu no Ordenamentu (MPO).
Nia lembra katak udan no anin boot ne’ebé mak akontese iha sidade Dili iha (04/04/21) hodi hamate ema balun no estraga ema-nia sasán hotu, nia hateten, ba vítima dezastre naturál ne’ebé lakon uma, SEPS no MAE, halo hotu ona levantamentu dadus no klasifika ona uma ne’ebé a’at.
Tuir Sekretáriu Estadu Protesaun Sivíl, Joaquim Gusmão, SEPS no MAE fahe ona formuláriu multi-setorál hodi identifika uma sira ne’ebé maka iha mota ninin, foho leten no rai halai atubele hadi’a filafali.
“Ita identifika hotu uma sira-ne’ebé a’at, hosi protesaun sivíl, ne’ebé iha tipu estragu tolu hanesan kma’an, no ladún no estragu hotu kedan, maibé la a’at sei la hadi’a”, katak.
Nia dehan, hosi kategória tolu maka foin fó asisténsia tuir padraun ne’ebé maka agora protesaun sivíl iha.
Ba kestaun ne’e, Ministériu Planu no Ordenamentu (MPO) iha papél halo mapamentu ba fatin sira-ne’ebé risku dezastre naturál. Maibé labele haruka filafali família sira bá uma, tanba ne’e Governu buka dalan atu re-aloka sira ba fatin seluk.
Entretantu tuir dadus ikus hosi MAE relata katak família hamutuk 2.558 hela iha área risku dezastre naturál iha Munisípiu Dili ne’ebé besik hela mota, lágoa ninin no foho lolon sira.
Notísia relevante : Governu sei hola rai privadu iha Hera ba vítima dezastre naturál
Jornalista : Osória Marques
Editór : Zezito Silva
