OÉ-CUSSE, 23 fevereiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), konstrui embun unidade-rua iha sub-rejiaun Nítibe hodi konserva udan-been nune’e fasilita animál, plantasaun no ortikultura iha tempu bailoron naruk.
Sekretáriu Rejionál ba Asuntu Agrikultura, José Eta, informa, iha tinan 2019 to’o 2020 Oé-Cusse enfrenta problema bee-moos afeta ba ema, animál, plantasaun no ortikultura nian.
Nune’e iha 2021 autoridade prevee orsamentu hosi OJE 2021 hodi konstrui embun rua, ida iha suku Suni-Ufe no ida iha suku Usitaco, perténsia sub-rejiaun Nítibe, tanba sub-rejiaun Oésilo Pásabe iha ona.
“Suni-Ufe nia progresu fiziku atinje ona 30%, iha suku Usitaco progresu 27%, objetivu prinsipál hosi obra rua ne’e atu kolleta udan-been, to’o tempu bailoron bele fornese ba animál no atividade agrikultura liuliu ortikultura,” José Eta, informa ba Agência Tatoli iha Oé-Cusse, kuarta ne’e.
Tanba kada tinan suku Suni-Ufe no Usitaco submete proposta husu apoia esavatór atu kee bee-posu fó hemu ba animal sira, nune’e tinan ida ne’e autoridade harii embun hodi responde iha tempu bailoron naruk, tanba suku sira-ne’e inklui área protejida.
Nia fó ezemplu, iha 2019 autoridade harii embun ida iha aldeia Tumin, suku Bobometo, sub-rejiaun Oésilo, nia funsionamentu to’o 2021 autoridade harii sentru viveru ida, nune’e bele uza ba preparasaun ai-oan ba kultivasaun iha área ne’ebé presiza.
Xefe suku Usitacu, Hilário Babo, agradese ba autoridade, tanba mini barajén rua ne’e bele benefísia komunidade Usitacu liuliu iha aldeia Oamna.
“Ha’u agradese tanba embun rua konstrui iha aldeia Oamna, ida tuan ne’e nia funsionamentu iha tempu bailoron naruk benefísia komunidade duni liuliu ba animál sira no uza mós ba ortikultura kuda nian, agora foun ne’e nia progresu servisu la’o hela,” autoridade lokál ne’e katak.
Entretantu tuir dadus hosi Sekretáriu Rejionál ba Asuntu Agrikultura nian, katak desde primeiru mandatu to’o tinan ne’e autoridade konsege konstrui ona mini barajén ka embun hamutuk unidade-ualu (8), iha sub-rejiaun Oésilo Pásabe no Nítibe.
Iha sub-rejiaun Pásabe iha suku Malelat, ida iha Aijaofukan suku Abani, sub-rejiaun Oésilo konstrui iha suku Usitaqueno, iha suku Bobometo konstrui iha aldeia Tumin, ida iha Kiubaki.
Nune’e mós iha sub-rejiaun Nítibe iha suku Usitaco nia benefisiu mai to’o suku Lela-Ufe, no daudaun ne’e unidade rua ida iha suku Usitaco no suku Suni-Ufe nia progresu sei la’o hela.
Projetu embun foun konstrui iha Oélpoti, suku Usitaco ezekuta hosi empreza Nautus Unipesoál, Lda, ho valór kontratu $86,714.40, no embun foun iha Oélsnapu suku Suni-Ufe ezekuta hosi empreza Viper Unipesoál, Lda, ho valór kontratu $86,532.90 ne’ebé aloka hosi Orsamentu Jerál Estadu (OJE) 2021 ho durasaun servisu fulan-haat.
Jornalisa : Abílio Elo Nini
Editór : Evaristo Soares Martins
