BIFANO fasilita materiál insetisida ba instituisaun Estadu prevene COVID-19

OÉ-CUSSE, 24 fevereiru 2022 (TATOLI) – Organizasaun Naun Governamentál (ONG) Binibu Faef Nome (BIFANO), apoia materiál insetisida ba instituisaun Estadu hodi prevenensaun hasoru surtu COVID-19 iha Rejiaun Administrativa Espesiál Oé-Cusse Ambeno (RAEOA).

Diretór ONG BIFANO, Jacinto Mala, informa, atividade ne’e hanesan apoia humanitária ba eskola sira, postu saúde no komunidade nune’e bele prevene-an hosi moras COVID-19 iha Oé-Cusse.

“Atividade ne’ebé BIFANO realiza ona iha fulan-fevereiru ne’e, ita distribui materiál hand sprayer iha insituisaun públiku ba eskola, postu saúde no komunidade, objetivu atu kria insetisida ka dezinfeta ba aula prezensiál sira no ema sira ne’ebá tama-sai iha área komplexu laran, bele prevene COVID-19, tanba antes ne’e BIFANO apoia mós materiál seluk hanesan máskara, sabaun balde, fase-liman maske ita hatene kazu menus maibé ita nafatin halo antesipasaun nune’e labele akontese tán iha Oé-Cusse,” Jacinto Mala, informa ba Agencia Tatoli, iha masin suku Costa, Oé-Cusse, kinta ne’e.

Nia fó-sai katak, materiál ne’ebé distribui ba iha instituisan públiku, iha eskola hamutuk 11 no postu saúde-ualu no materiál-sira, hand sprayer hamutuk unidade 19.

Nune’e mós distribui panfletu 400 nu’udar promosaun ba komunidade iha sub-rejiaun Oésilo, Pásabe, Nítibe no Pante Makasar.

Nune’e instituisaun Estadu sira-ne’ebé hetan mak iha sub-rejiaun Nítibe, apoia iha Eskola Bázika Filiál Nefotamtasa, Eskola Bázika Filiál Besatoko no postu saúde Ban-Afi, perténsia suku Ban-Afi.

Iha sub-rejiaun Oésilo apoia iha Eskola Sekundária Públika Puinbeno, Eskola Bázika Filiál Binibu Pune, Eskola Bázika Sentrál Tasa’e-Benu, Eskola Bázika Filiál Buqui, Eskola Bázika Filiál Faef-Nome no postu saúde Pune, perténsia suku Usitasa’e no postu saúde Nibin, suku Usitaqueno.

Iha sub-rejiaun Pante Makasar apoia iha Eskola Bázika Sentrál Boboloa, postu saúde Bimelo, perténsia suku Bobokase, Eskola Bázika Sentrál Tula-Ika, postu saúde Lifau, perténsia suku Lifau no Eskola Bázika Filiál Sakato no postu saúde Sakato, perténsia suku Nipani.

Iha ha sub-rejiaun Pásabe apoia iha postu saúde Malelat, suku Malelat no postu saúde Pásabe, suku Abani.

Purtantu kona-ba apoia umanitária ba komunidade hanesan panfletu promosaun nian hakerek ho lian tetun no Baiqueno hamutuk 400, fasil ba sira atu komprende no panfletu ne’e informa atu labele ta’uk atu simu vasina COVID-19 no oinsá uza máskara ho loloos no fase liman.

“Apoia hirak-ne’e realiza iha komunidade sub-rejiaun, Pásabe iha suku Malelat, suku Abani, iha sub-rejiaun Pante Makasar iha suku Bobokase, suku Cunha no suku Lalisuk, no komunidade iha suku Nipani, suku Lifau, nomoos ba instituisaun Estadu, grupu romansa no taka sede suku sira,” sosiedade sivíl ne’e fó-sai.

Diretór edukasaun RAEOA, Daniel Mauno, reprezenta diresaun edukasaun RAEOA agradese tanba edukasaun iha situasaun defisil hanesan ne’e, maibé koopera ho ema hotu inklui ONG lokál nasionál no internasionál sira atu apoia malu halo prevensaun.

“BIFANO ho OXFAM, sira oferese ita materiál prevensaun la’os primeiru maibé beibeik ona apoia eskola sira, balde fase-liman, máskara, sabaun no seluk, tan ne’e hanesan dirijente edukasaun ha’u agradese ba sira-nia tulun, maske prevensaun sei la’o nafatin apresia ba sira-nia kontribuisaun, nune’e ita espera iha futuru kooperasaun ne’e la’o nafatin bainhira akontese situasaun difisil hanesan ne’e,” nia orgullu.

Programa ne’ebé ONG BIFANO realiza hetan apoia fundu hosi OXFAM ho porgrama Australian Humanitária Project.

Jornalista   : Abílio Elo Nini
Editór         : Evaristo Soares Martins