DILI, 24 fevereiru 2022 (TATOLI)-Vise Ministru Obra Públika, Nicolau Freitas, informa daudaun ne’e, simu ona proposta husi autoridade munisipál, Munisípiu 12 atu normaliza estrada sira ne’ebé kondisaun grave hodi liga bá sentru votasaun ba eleisaun prezidensiál iha loron 19 fulan-marsu 2022.
“Ita simu pedidu nune’e orienta ona Instituisaun Jestaun Ekipamentu (IJE) hodi kanaliza ekipamentu pezadu hodi atende,’’Nia hateten ba Tatoli iha Parlamentu Nasionál, kinta ne’e.
Notísia Relevante :Identifika sentru votasaun 22 iha Covalima la asesu naroman no 12 difikulta ba estrada
Governante ne’e, dehan atividade normalizasaun estrada ne’e sei haree halo bazeia ba nesesidade husi proposta ne’e rasik.
Maibé baibain ne’e, IJE iha kapasidade atu ateru estrada ko’ak sira, hadi’a dalan sira kotu no mós loke dalan foun hodi fasilita ekipa téknika STAE no CNE hodi distribui bulletin votu ba área rurál sira.
“Ita hahú hala’o servisu iha terrenu hein bele responde situasaun dalan liga ba sentru votasaun iha eleisaun mai,”Nia hateten.
Mezmu Institutu Jestaun Ekipamentu iha ekipamentu limitadu atu atende preokupasaun hotu-hotu, maibé Vise MOP ne’e promete sei jere rekursu no ekipamentu ne’ebé maka iha hodi atende situasaun emerjénsia iha terrenu.
Iha sorin seluk, antes ne’e, Deputadu CNRT, Arão Noe husu ba MOP hodi identifika estrada rurál ne’ebé ho kondisaun grave, atu nune’e bele hadi’a lalais antes distribui materiál eleisaun ba terrenu.
“Hanoin hanesan informasaun ne’ebé iha sentru votasaun sei barak maibé fatin barak estrada asesu ba susar se Ministériu Obras Públika (MOP) ho Institutu Jestaun ekipamentu la halo intervensaun ka normalizasaun mak sei difikulta STAE atu mobiliza materiál sensitivu sira iha eleisaun prezidensiál 19 marsu,” Nia hateten
Deputadu Fretilin, Dario Madeira, husu ba Ministériu Administrasaun Estatál (MAE) atu koordena ho Ministériu Obras Públika hodi orienta IJE, atu identifika dalan ne’ebé liga sentru votasaun ladi’ak liu-liu área izoladu sira ne’ebé susar atu asesu iha tempu udan.
Tanba, tuir observasaun balun ne’ebé hala’o iha Munisípiu Viqueque nota katak iha suku Batata, Postu Uatucarbau Villa hanesan fatin izoladu ne’ebé defisil atu asesu.
“Susar liu mak iha tempu udan dadaun ne’e labele asesu ba estrada motor ho karreta para iha suku Afaloicai hafoin ba iha suku Batata. No foin dadaun finde semana hau konsege to’o iha ne’ebá, maibé karreta nia roda pipu sira haksoit sai hotu tanba dalan ladi’ak,”Nia preokupa.
Nune’e mós Prezidente Parlamentu Nasionál reforsa Governu persiza konsidera hodi tau iha planu normalizasaun estrada.
“Presiza normaliza lalais dalan tanba ita agora iha preparasaun eleisaun prezidensiál hanesan kampaña to’o ba eleisaun iha 19 marsu,”Aniceto hateten.
Jornalista: Nelson de Sousa
Editór: Agapito da Silva
