BAUCAU, 24 fevereiru 2022 (TATOLI) – Governu liuhosi Konsellu Administrasaun Fundu Infraestrutura (KAFI) deside konstrui irrigasaun Galata ne’ebé lokaliza iha postu administrativu Venilale, munisípiu Baucau, hodi fornese bee ba agrikultór iha postu Venilale iha tinan ida-ne’e.
Diretora Jerál Ministériu Agrikultura no Peska (MAP), Maria Odete do Céu Guterres, fó-sai katak, governu aprova no tinan ne’e sei konstrui irrigasaun Galata, suku Uatuhaco, postu administrativu Venilale ne’ebé sei fornese bee ba agrikoltór iha postu Venilale no Ossu, munisípiu Viqueque.
Projetu refere ho tipu multianuál ho ninia orsamentu tótal millaun $14 hosi Fundu Infraestrutura (FI) nune’e parte MAP fó deit parseria tékniku, enkuantu prosedimentu konkursu lidera hosi Komisaun Nasionál Aprovizonamentu (CAN, sigla portugés).
Dirijente ne’e rekoñese, probelema infraestrutura liuliu irrigasaun sai prekupasaun agrikultór iha territóriu nasionál inklui Baucau.
Diretór Servisu Munisipál Agrikultura no Peska Baucau, Moises Lobato Perreira, hateten, planu konstrusaun irrigasaun Galata sei kobre postu admistrativu Venilale no Ossu, viqueque.
Tuir planu sei iha odamatan bee rua ne’ebé parte leste fornese ba postu Ossu, munisípiu Viqueque no parte Oeste sei fornese ba suku Uatuhaco, Uailaha, Baduho’o no Bahamori, postu Venilale, purvolta natar ekatre rihun ida-resin.
“Tinan-ne’e konstrui bele ajuda ona ita-nia maluk agrikulkór sira tanba kada tinan irrigasaun iha Galata sempre normaliza,” Moises Perreira hateten.
Jornalista : Natalino Belo
Editór : Evaristo Soares Martins
