VIQUEQUE, 24 fevereiru 2022 (TATOLI)-–Koordenadór Organizasaun Rezisténsia Santo António munisípiu Viqueque, Julverto Raimundo, deklara, membru organizasaun ne’e sei fó apoiu ba kandidatu Prezidente Repúblika (PR), Lere Anan Timur ba períodu 2022-2027, kompete iha Eleisaun Prezidensiál iha loron 19 marsu.
“Ami-nia Prezidente organizasaun deklara katak fó apoiu kandidatura Lere Anan Timur. Nune’e ami deklara apoiu kandidatura Prezidente Repúblika Lere Anan Timur,” Koordenadór hateten bainhira simu kandidatu PR Tenente Jenerál Reformadu, Lere Anan Timur, iha suku Caraubalo, kinta ne’e.
Notísia relevante: Kandidatu Lere rejista ofisialmente iha Tribunál Rekursu
Organizasaun ne’e eziste iha munisípiu Viqueque iha tinan 1986, ho membru hamutuk na’in-87 ne’ebé antes ne’e hetan kapturasaun hosi militár Indonézia.
Iha fatin hanesan, kandidatu PR ho númeru sorteu 08, Tenente Jenerál Reformadu, Lere Anan Timur, agradese ba organizasaun sira ne’ebé fó apoiu ba nia.
“Agradese ba organizasaun sira hotu ne’ebé deklara iha fatin hotu, atu fó apoiu ba ha’u-nia kandidatura Prezidente Repúblika. Ha’u konfia ha’u-nia an, konfia povu nia forsa no povu sei fó votu ba ha’u. Ha’u la fahe osan ba povu tanba ha’u foin tama etapa foun iha ha’u-nia moris,” nia dehan.
Jornalista : Vitorino Lopes da Costa
Editora : Julia Chatarina
