UNTL sei rekruta dosente 51 reforsa ensinu aprendizajen
DILI, 24 fevereiru 2022 (TATOLI)–Universidade Nasionál Timor-Lorosa’e (UNTL) tinan ne’e sei rekruta tan dosente profisionál na’in-51 atu reforsa prosesu ensinu aprendizajen estudante sira.
Tuir Reitór UNTL, João Martins, daudaun ne’e sira iha dosente hamutuk na’in-500 resin, maibé númeru la sufisiente atu responde nesesidade universidade nian.
“Tanba ne’e sei rekruta tan dosente profisionál 51 atu apoiu tan akadémiku ba oin. Ita-nia dosente menus tebes, labele responde nesesidade estudante ne’ebé barak, iha 27.000 resin, tanba ne’e maka ami planu atu rekruta tan dosente hodi responde nesesidade universidade,” Reitór hateten iha salaun kampus Hera, kinta ne’e.
Notísia relevante: UNTL garante fasilidade sufisiente simu estudante 4.100
Inisiativa ne’e tanba universidade hakarak hadi’a kondisaun universidade tanba daudaun ne’e rejista totál estudante hamutuk 40.000 resin, maibé estudante ativu iha 27.000 resin.
Aleinde ne’e, parte universidade iha planu atu simu tan estudante foun hamutuk 4.100 iha tinan ne’e.
Jornalista : Tomé Amado
Editora : Julia Chatarina
