PR Lú Olo sei foti férias anuál to’o meadu fulan-marsu
DILI, 25 fevereiru 2022 (TATOLI)-Prezidente Repúblika, Francisco Guterres ‘Lú Olo’, sei foti férias anuál hosi loron 28 fulan-fevereiru to’o loron 16, marsu 2022.
Tuir Estatutu Titulár Órgaun Soberania, (númeru 4 artigu 10, Lei n°7/2007, 25 jullu altera husi Lei n°7/2017, 26 abril), tinan-tinan titulár no membru órgaun soberania sira iha direitu ba períodu férias loron 30.
Notísia Relevante :Kandidatu PR Lú-Olo rejista ona iha Tribunál Rekursu
Maibé tanba motivu servisu, tinan-tinan Prezidente Repúblika, Francisco Guterres Lú Olo, la hasai féria tuir lei determina.
“Liu hosi karta iha 21 fevereiru ne’e Prezidente Repúblika informa ba Prezidente Parlamentu Nasionál katak sei goza férias iha 28 fevereiru no mós iha loron úteis husi 1 to’o 16 marsu 2022, iha territóriu nasionál,” hakfuir nota komunikadu ne’ebé Tatoli asesu, sesta ne’e.
Tanba, Prezidente Repúblika órgaun unipesoál (ema ida de’it mak kaer), nia sei hala’o nafatin ninia knaar tuir Konstituisaun haruka durante períodu férias ne’e.
Entertantu, antes ne’e atuál Prezidente Repúblika, Francisco Guterres ‘Lú Olo’ hetan ona legalizasaun hosi Supremu Tribunál Justisa (STJ), ba ninia kandidatura hodi kompete iha eleisaun prezidensiál períodu 2022-2027.
Tuir oráriu hosi Sekretáriadu Tékniku Administrasaun Eleitorál (STAE), ba kampaña eleisaun prezidensiál sei hahú iha loron 02-16 fulan-marsu 2022.
Enkuantu, eleisaun prezidensiál sei realiza iha 19 marsu tinan 2022.
Jornalista: Nelson de Sousa
Editór: Agapito dos Santos
