DILI, 27 fevereiru 2022 (TATOLI)–Juventude Loriku Asu’wain no Relijiozu hosi Laivai, munisípiu Lautém, domingu ne’e, deklara fó apoiu tomak ba Kandidatu Prezidente Repúblika (PR) períodu 2022-2027, Tenente Jenerál Reformadu, Lere Anan Timur.
“Ami hakarak hamriik iha filleira ida no deklara katak, fó apoiu tomak ba Kandidatu Prezidente Repúblika, Tenente Jenerál Reformadu, Lere Anan Timur, tanba ami-nia esperansa katak nia sei marka diferensa no tau-a’as Konstituisaun hodi haforte paz, unidade, justisa no diálogu, ne’ebé hanesan úniku solusaun ba impase polítika hodi hakat ba dezenvolvimentu,” Portavóz Grupu, Sebastião Marques, hateten liuhosi konferénsia imprensa, iha Santa Cruz.
Notísia relevante: Kandidatu Lere rejista ofisialmente iha Tribunál Rekursu
Grupu ne’e nota katak impase polítika ne’ebé la’o daudaun iha rai doben, halo povu ai-leba kontinua sai vítima no haree katak impase ne’e mosu tanba arogánsia no egoizmu líder polítiku sira, Estadu ne’ebé fraku no la utiliza Konstituisaun hanesan mata-dalan hodi dezenvolve Timor-Leste sai nasaun demokrátiku no dezenvolvidu hanesan mós rai seluk.
“Ho nune’e, estudante no juventude Laivai-oan ne’ebé hela namkari iha Timór laran tomak no iha estranjeiru hanesan Austrália, Koreia, Inglatera, Irlanda, Indonézia, Portugal no rai seluk tan hamutuk ho inan-aman, veteranu, kaixa klandestina, Sagrada Família, Juventude Loriku Asu’wain no Relijozu iha Laivai, apoiu tomak Lere Anan Timur.
“Tenente Jenerál Reformadu sei sai lideransa ezemplar ba líder seluk, tamba povu Timor-Leste tomak hatene katak úniku Jenerál Lere mak hatene respeitu no konsidera maluk líder sira seluk,” Portavóz dehan.
Rai Laivai uluk iha tempu okupasaun, hanesan zona mean luta ba ukun rasik-an, tanba ne’e Laivai-oan sira asegura no kuidadu Asu’wain no Komandu Luta hanesan Saudozu Rodak, Saudozu Mauk Moruk, Saudozu Oli Lemorai, Lere Anan Timur, Cornelio Gama L-7, Kaer Susar no sira seluk.
“Iha tempu ne’e, hamutuk nafatin iha filleira ida hodi fó onra no defende nafatin Laivai nia istória hodi apoiu no fó votu konfiansa ba ita-nia aman Lere Anan Timur,” nia akresenta.
Iha fatin hanesan, Koordendór munisípiu Lautém, Celestino do Santo Eloy, hateten, Juventude Laivai-oan nia polítika preparadu hodi kumpre no reklama ona iha baze tanba serbisu konsolidasaun la’o hela iha munisípiu Lautém nia laran hodi apoiu Lere Anan Timur.
“Iha suku Laivai ami laiha rezerva, ami-nia apoiu totalmente ba ami-nia Jenerál Lere Anan Timur atu avansa ba Prezidente Republika ba tinan 2022 to’o 2027 no ami fiar 100% iha territóriu Timór fó konfiansa ba kandidatu ne’e hodi lori Estadu ne’e,” nia afirma.
Antes ne’e, iha loron 02 fevereiru, Kandidatu PR, Tenente Jenerál Reformadu Lere Anan Timur, rejista iha Tribunál Rekursu hodi kompete ba Eleisaun Prezidensiál, ne’ebé realiza iha loron 19 marsu 2022.
Rejistrasaun ne’e hosi ekipa susesu hamutuk Veteranu no Antigu Kombatente Libertasaun Nasionál, ne’ebé lideradu hosi Cornelio Gama L-7, ho lista apoiante 9.000.
Jornalista : Felicidade Ximenes
Editora : Julia Chatarina
