COVALIMA, 28 fevereiru 2022 (TATOLI) – Prezidente Konselu Veteranu Munisípiu Covalima, Osorio Soares “Mausoko”, informa konsellu veteranu sei la selebra loron nasionál ne’ebé monu iha loron 3 fulan marsu tanba ministru no Prezidente Repúblika tuir kampaña eleitorál.
“Tuir loloos ita realiza atividade sira, hanesan sertame, semináriu, misa no kari ai-funan no hasa’e bandeira maibé horseik Prezidente Konsellu Veteranu informa liuhosi via telefone katak atividade hirak ne’e kansela hotu, tanba ita nia ministru no Prezidente Repúblika tuir kampaña eleitorál”, Osorio Soares hateten ba Agênsia Tatoli, iha nia kna’ar fatin Tabakolok, ohin.
Tuir nia katak maske la realiza loron nasional veteranu maibé nia mós husu ba joven patriorizmu no nasionalizmu atu hametin nafatin unidade, tenke respeita malu no hadomi malu ne’e importante iha ámbitu selebrasaun kampaña eleitorál no joven intelektuál sira hakmatek no labele provoka situasaun.
Rekorda katak Konsellu Ministru ofisialmente deside loron 3 fulan marsu sai loron nasionál veteranu, desizaun governativa ne´e iha 17 abril 2015.
Konsellu Kombatente Libertasaun Nasionál harii iha tinan 2011, bainhira Parlamentu Nasionál aprova tiha alterasaun ba lei númeru 2/2002, loron 23 fulan-marsu. Número 3 husi artigu 35. Lei ida ne’e nian define katak estrutura Konsellu Kombatente Libertasaun Nasionál define ona ho Dekretu-Lei, liuhusi konsulta ho organizasaun hirak ne’ebé reprezenta Kombatente Libertasaun Nasionál nian sira.
Tanba ne’e, Dekretu-Lei ne’e aprova ona hosi Konsellu Ministrus hodi konfere ho Kombatente sira kna’ar determinante ida iha promosaun dezenvolvimentu sustentável Timor-Leste nian, iha pás no estabilidade sosiál nasaun nian.
Ho intensaun hodi hanoin loron 3 fulan-marsu tinan 1981, loron hahú organiza fali rezisténsia iha periódu ne’ebé maka difísil liuhosi istória Luta Libertasaun Nasionál nian, ne’ebé deside ona hodi konsidera loron ne’e hanesan Loron Nasionál Veteranu sira nian.
Jornalista : Celestina Teles
Editór : Zezito Silva
