iklan

EDUKASAUN, HEADLINE

UNPAZ halo pagamentu inzensaun propina semestre par ba estudante 9.167

UNPAZ halo pagamentu inzensaun propina semestre par ba estudante 9.167

Reitór UNPAZ, Adolmando Soares Amaral. Imajen TATOLI/Egas Cristovão

DILI, 28 fevereiru 2022 (TATOLI)—Universidade da Paz (UNPAZ) halo ona pagamentu inzensaun propina semestre par ba estudante ativu hamutuk 9.167.

“Pagamentu subsídiu propina ne’ebé universidade realiza ba estudante sira iha faze rua, dahuluk realiza ona ba estudante ativu 9.167 no daruak sei halo ba estudante finalista 1.200,” Reitór UNPAZ, Adolmando Amaral, informa ba Agência TATOLI, iha kampus UNPAZ, Osindo 1 Manleuanan, segunda ne’e.

Pagamentu propina faze dahuluk ba estudante ativu sira atinje ona 80%, hafoin ramata maka parte universidade sei haree estudante finalista sira, tanba antes ne’e lista submete ona ba Ministériu Ensinu Superiór Siénsia no Kultura (MESSK).

Notísia relevante: MF realiza pagamentu inzensaun propina faze daruak ba estudante 66.106

Lista daruak ne’ebé universidade submete ba Governu, inklui mós ho lista estudante finalista sira, tanba ne’e osan ne’ebé Ministériu Finansa (MF) transfere mai konta bankária universidade mós konta ho estudante finalista sira hotu.

“Tanba ne’e ita atende uluk estudante ativu sira lai, kuandu hotu ona maka ita sei ba foti fali osan hodi atende fali estudante finalista sira,” nia akresenta.

Pagamentu propina ba estudante UNPAZ, la bazeia ba deklarasaun Governu, kada estudante sei hetan $150 tanba lista ho propina ne’ebé maka aplika iha kada universidade la hanesan.

Aleinde ne’e, UNPAZ ninia pagamentu propina boot liu, kada semestre $135, ne’ebé estudante sira sei asesu tuir propina kada semestre.

“Ezemplu Fakuldade Ekonomia, Direitu no Siénsia Umana, sira hetan propina kada semestre $110 de’it, ne’ebé universidade sei selu tuir nafatin valór propina ne’ebé maka aplika ona iha kada fakuldade,” nia tenik.

Enkuantu, valór subsídiu ne’ebé Governu liuhosi MF transfere ona ba konta bankária UNPAZ hamutuk $1.152.835, ne’ebé orsamentu ne’e mak sei uza hodi halo pagamentu ba estudante ativu 9.167 inklui estudante finalista 1.200.

Jornalista : Tomé Amado    

Editora     : Julia Chatarina

iklan
iklan

Leave a Reply

iklan
error: Content is protected !!