VIQUEQUE, 01 marsu 2022 (TATOLI)–Observadór internasionál hosi Uniaun Eropeia (UE) destaka ona ema na’in-rua iha munisípiu Viqueque hodi halo observasaun iha kampaña no Eleisaun Prezidensiál, to’o prosesu ne’e ramata.
“Ami na’in-rua to’o horiseik, mai hanesan observadór internasionál hosi Uniaun Europeia, hodi hala’o ami-nia misaun observasaun kampaña to’o eleisaun remata iha munisípiu Viqueque,” Reprezentante Observadór internasionál UE, Ulla Kajsa Norman, hateten ba Agência TATOLI, iha Beloi, tersa ne’e.
Notísia relevante: CNE Viqueque realiza paktu eleisaun pasífiku
Tuir observadór, maski halo oberservasaun ba kampaña no loron eleisaun, maibé la halo intervensaun ba prosesu tomak.
“Ami mai iha ne’e, sei halo observasaun ba aspeitu hotu iha tempu kampaña no eleisaun, maibé karik iha kampaña maka mosu konflitu ruma, ami la halo intervensaun tantu iha eleisaun, maibé ami halo observasaun de’it no halo relatóriu ne’ebé sei haruka ba Belgia,” nia akresenta.
Observadór sei observa komponente esensiál ba atividade UE hodi promove demokrasia, diretu umana no estadu diretu.
“Hosi observasaun eleitorál mak bele kontribui hodi reforsa demokrátiku no konstrui konfiansa públiku ba prosesu eleitorál tomak,” nia dehan.
Observadór internasionál hosi UE ne’ebé destaka iha Viqueque sei kolabora ho Komisaun Nasionál Eleisaun (CNE, sigla portugués), Sekretáriu Tékniku Administrasaun Eleitorál (STAE), mídia no parte hotu iha munisípiu Viqueque.
Jornalista : Vitorino Lopes da Costa
Editora : Julia Chatarina
