DILI, 01 marsu 2022 (TATOLI)–Diretór Eskola Ensinu Sekundáriu Jerál (ESJ) 12 Novembru Becora, Aniceto Pedro da Costa, husu ona ba profesór kontratadu inklui guarda eskola ne’ebé hela iha biblioteka eskola atu hamamuk fatin.
“Ita halo ona negosiasaun ho parte ne’ebé okupa fasilidade eskola, atu hamamuk fatin no sira prontu sai, maibé to’o agora seidauk hetan fatin hodi sira hela,” Diretór Eskola hateten ba Agência TATOLI, iha resintu eskola, Becora, tersa ne’e.
Notísia relevante: Eskola ESJ 12 Novembru no Cristal limita estudante foun
Nia konsidera, fasilidade eskola nu’udar meiu ida atu apoiu autoridade edukasaun sira uza hodi hala’o atividade ensinu aprendizajen ba estudante sira.
“Maibé kuandu ema uza fasilidade eskola sai fali fatin privadu hodi hala’o ninia atividade partikulár, eskola ne’e sei hasoru difikuldade iha futuru,” nia akresenta.
Maski nune’e, esforsu negosiasaun ne’ebé Diretór Eskola halo ho parte rua seidauk hetan solusaun tanba okupante sira seidauk hetan fatin ida dignu, ne’ebé sira hela iha biblioteka eskola hahú iha krize 2006.
“Iha inísiu, mestre kontratadu no guarda eskola de’it mak hela iha biblioteka, maibé tempu la’o daudaun to’o ohin loron iha ona ema lubuk ida mak hela hamutuk ho sira na’in-rua. Parte eskola seidauk foti dadus ema na’in-hira maka hela, maibé Diretór Servisu Edukasaun Dili husu atu hasai dadus, ida-ne’e mak parte eskola sei halo,” nia dehan.
Relasiona ho kestaun ne’e, Agência TATOLI tenta konfirma ho okupante fasilidade eskola maibé seidauk hetan konfirmasaun.
Eskola ESJ 12 Novembru daudaun hahú realiza ona prosesu konstrusaun ba edifísiu rua ho sala aula neen, ho kustu projetu $130.000 resin.
Jornalista : Tomé Amado
Editora : Julia Chatarina
