DILI, 01 marsu 2022 (TATOLI)—Ministru Obra Públika, Salvador Eugênio Soares dos Reis Pires, hasoru malu ho Primeiru-Ministru (PM), Taur Matan Ruak, hodi relata dezafiu durante implementasaun projetu infraestrutura ne’ebé hetan estragu tanba dezastre naturál, kuaze la tuir tempu ne’ebé determina ona.
“Ha’u hato’o ba Primeiru-Ministru, ha’u ladún kontente ho prosesu burokrasia ne’ebé difikulta iha área MOP, tanba públiku hatene área estrada, ponte no kontrolu cheia ne’e MOP nian, la’ós ministériu nian, maibé desizaun envolve interministeriál, tuir lei konstitui iha órgaun koleziál ne’ebé iha Konsellu Administrasaun Fundu Infraestrutura (KAFI),” Ministru relata, iha Rezidénsia ofisiál Xefe Governu, Farol, tersa ne’e.
Notísia relevante: Progresu levantamentu dadus estragu infraestrutura públiku tama faze datoluk
Tuir governante ne’e, kestaun hirak ne’e sai dezafiu, maibé funsionamentu Governu tuir lei ba prosesu siklu projetu, administravamente nia lala’ok mak hanesan ne’e, tanba ne’e enkuantu seidauk habadak burokrasia sira, ninia prosesu sei sai nafatin dezafiu ba promosaun projetu sira.
Hafoin ekipa finaliza levantamentu dadus no konklui iha área ne’ebé hetan estragu infraestrutura, depende ba desizaun hosi ministériu hotu, ezemplu Fundu Infraestrutura ne’ebé envolve membru Governu balun, entaun presiza halo desizaun kona-ba investimentu sira.
“Hanesan iha lei KAFI nian, serbisu maka atu aprova finansiamentu projetu sira ne’ebé finansia hosi Fundu Infraestrutura, signifika iha ne’e liuhosi MOP no na’in ba projetu mak MOP, maibé labele halo desizaun sein vistu hosi membru sira seluk, tanba iha ministériu no ajénsia seluk mak administra Fundu Infraestrutura, ezemplu grande projetu iha Ministériu Planu no Ordenamentu nia okos, tanba ne’e maka haree katak prosesu ne’e tomak check balance ne’e lais no di’ak, maibé kuandu kleur demais perturba fali ezekusaun sira,” Ministru esplika.
Iha sorin seluk, MOP hamutuk ho ekipa Task Force konklui ona planeamentu ba projetu infraestrutura sira ne’ebé hetan estragu durante dezastre naturál iha tinan 2021.
“Projetu sira ne’ebé la’o hela iha munisípiu 12 no ponte Bekusi, ne’ebé foin lalais ekipa Task Force halo levantamentu, ninia planeamentu ba estrada rurál sira kuaze konklui ona, maibé sei iha tan etapa tuir mai mak koordenasaun ho liña ministeriál sira seluk, tanba tuir lei tenki halo serbisu atubele promove projetu sira ne’e ba oin,” nia akresenta.
Maski papel MOP kuaze konklui ona, hanesan planeamentu, maibé etapa tuir mai mak liga ho servisu interministeriál, bazeia ba lei, atubele promove projetu sira hanesan verifikasaun no aprovasaun iha KAFI.
Entre projetu infraestrutura hamutuk 114 ne’ebé mak ekipa identifika hetan estragu, konsege halo ona projetu 32, ho kustu millaun $12,9, ne’ebé ekipa MOP no Task Force prepara ona no balun mak promove ona, enkuantu seluk sei iha prosesu aprovizionamentu no verifikasaun.
Jornalista : Antónia Gusmão
Editora : Julia Chatarina
