AILEU, HEADLINE, POLÍTIKA

Constâncio Pinto promete sei prioritiza asuntu neen no PED bainhira eleitu ba PR

Constâncio Pinto promete sei prioritiza asuntu neen no PED bainhira eleitu ba PR

Kandidatu Prezidente Repúblika independente períodu 2022-2027, Constâncio Pinto ‘Terus’. Imajen TATOLI/Anito Soares

AILEU, 02 marsu 2022 (TATOLI) – Kandidatu Prezidente Repúblika (PR), Constâncio Pinto ‘Terus’, promete katak sei prioritiza asuntu neen no Planu Estatéjiku Dezenvolvimentu (PED) bainhira eleitu sai Xefe Estadu ba períodu 2022-2027.

“Ha’u sei fó importánsia ba iha setór neen durante mandatu. Sei serbisu hamutuk ho Governu atubele responde povu nia nessesidade no hadi’a ita hotu nian vida liuhusi orsamentu Estadu”, nia afirma, ohin, iha kampaña dahuluk, iha merkadu Aileu.

Prioridade dahuluk ne’ebé sai atensaun ba kandidatu ne’e mak edukasaun, ne’ebé sei haruka timoroan rihun 10 bá estuda iha nasaun oioin iha kursu diferente hodi bele desenvolve Timor-Leste.

“Estudante sira la’ós husi Dili de’it, maibé mai husi aldeia, liuliu povu kbiit-la’ek hodi bele estuda no desenvolve ninia rai. Tanba ne’e, husu atu fó imi-nian apoia iha eleisaun presidensiál ne’e”, nia realsa.

Asuntu seluk mak iha saude, prisipalmente ba iha alimentasaun nian hodi kombate má nutrisaun iha rai-laran. “Dalaruama ai-moruk laiha rezulta pasiente mate. Aumenta médiku sira iha unidade hospitalár iha Timor-Leste no estabelese tan sentru saúde atubele fó atendimentu ida ne’ebé di’ak no dignu ba povu”.

Constâncio Pinto afirma tan katak prioridade seluk sai Xefe Estadu mak presta atensaun ba infraestrurura sira. Nia fó ezemplu, daudaun ne’e estrada bá Lequidoe grave tebtebes. “Tanba polítika ladún adekuada hodi tau prioridade ba área rurál sira”.

Asuntu imporante tuirmai mak hakarak hadi’ak relasaun internasionál hodi bele lobby investidór estranjeiru sira atu investe iha área oioin iha país ne’e.

“Hakarak sai mediadór ba líder sira hanesan Xanana Gusmão, Ramos Horta no Alkatiri hodi bele iha entendimentu ida hodi lori rai ida ne’e ba oin”, nia hatete.

Prioridade ikus mak kandidatu hakarak mellora ekonomia rai ida ne’e ho objetivu mak hakbiit povu nia moris.

“Husu ba maluk sira labele kestiona ho ha’u-nian kapasidade ba ukun. Prontu ba ukun tanba ha’u iha esperiénsia durante tinan 20-resin hodi hala’o serbisu diplomasia, klandestina no rezisténsia nian”, nia salienta.

Nia esplika katak abertura komísiu iha rai husar Aileu ho objetivu mak hakarak la’o tuir ain fatin “avó Francisco Xavier do Amaral, tanba iha tinan 1975 saudozu halo kampaña Fretilin nian iha merkadu Aileu”.

“Hanesan Aileu o’an ida hakarak la’o tuir avó Xavier. Tanba ne’e, ha’u-nian lema nu’udar kandidatu Prezidente Repéblika mak ‘Hamutuk ho Há’u Hametin Estadu Demokrátiku no Hamaran Povu nia Mataween’.  Hamaran povu nia matabeen ne’e liafuan murak husi avó Xavier. Nune’e, hakarak implementa ninia liafuan bainhira sai Xefe Estadu”, konklui.

Nia akresenta objetivu husi restaurasaun independénsia mak rai ne’e estável, riku no povu ne’ebé moris saudável.

Iha sorin seluk, observadora Uniaun Europeia (UE), ne’ebé haree direta atividade kampaña kadidatu ho númeru sorteiu 11, Igno Buttner, hatete organizasaun internasionál ne’e aplika nafatin metodolojia observasaun hanesan iha nasaun hothotu.

“Ida ne’e hanesan observasaun ida kompriensivu no longu prazu ho kobertura ne’ebé aumenta iha loron eleisaun nian”.

Nia salienta ninia avaliasaun imparsiál no independente husi instituisaun sira. Observadór sira halo tuir pratika la’ós interferénsia iha prosesu eleisaun no kooperasaun ho país akollimentu.

“Ami husi UE mai halo observasaun de’it. Tuir ami-nian haree buat hothotu la’o di’ak tebes no tuir lei haruka”, nia informa.

Nune’e mós Diretór Komisaun Nasionál Eleisaun (CNE) Munisípiu Aileu, Nélio da Costa Guterres, dehan primeira kampaña kandidatu ho númeru sorteiu 11 iha Aileu di’ak tanba kumpre orientasaun hotu ne’ebé iha, hanesan oras no ekipa sira fahe brosura halo mós edukasaun sívika.

Iha atividade ne’e hetan mós observasaun direita husi Provedoria Direitu Umanu no Justisa. Polísia Nasionál Timor-Leste asegura komísiu ne’e ho di’ak.

Kampaña refere hetan partisipasaun husi populasaun no negosiante sira hodi rona programa no planu kandidatu nian.

Prosesu eleitorál ba eleisaun presidensiál komesa loron 02 to’o 16 marsu.  Períodu  kampaña termina loron rua antes votasaun iha 19 fulan ne’e.

Jornalista: Domingos Piedade Freitas

Editora: Maria Auxiliadora

iklan
iklan

Leave a Reply

iklan
error: Content is protected !!