iklan

HEADLINE, MUNISÍPIU, VIQUEQUE

Veteranu Viqueque triste Governu la komemora loron veteranu

Veteranu Viqueque triste Governu la komemora loron veteranu

Sekretáriu Ezekutivu Konsellu Veternu munisípiu Viqueque, Daniel Sarmento Soares ‘Fogete’. Imajen TATOLI/Vitorino Lopes da Costa

VIQUEQUE, 02 marsu 2022 (TATOLI)–Sekretáriu Ezekutivu Konsellu Veternu munisípiu Viqueque, Daniel Sarmento Soares ‘Fogete’, hateten, veteranu munisípiu Viqueque sente triste tanba Governu la komemora loron nasionál ba veteranu sira iha loron 03 marsu.

“Ami sente triste tanba Governu la komemora loron 03 marsu sai hanesan loron veteranu Timor-Leste. Ami hakarak komemora, bazeia ba enkontru ne’ebé ami hala’o iha Konsellu Nasionál katak iha orsamentu hodi komemora,” Veteranu Daniel Sarmento Soares ‘Fogeti’, dehan ba Agência TATOLI, iha ninia knaar fatin, Viqueque Villa, kuarta ne’e.

Notísia relevante: Governu deside la selebra “Loron Nasionál Veteranu” tanba kampaña eleitorál

Veteranu ne’e haktuir, iha enkontru iha Konsellu Veteranu Nasionál, antes ne’e Governu liuhosi Ministériu Asuntu Kombatente Libertasaun Nasionál (MAKLN) koloka orsamentu  ba kada munisípiu sira, ne’ebé munisípiu Viqueque hetan alokasaun $12.500 hodi komemorasaun loron veteranu.

“Nune’e, ami fila mai Viqueque hodi prepara planu no enkontru hamutuk ho veteranu sira hosi postu administrativu lima iha Viqueque. Programa ne’ebé ami atu realiza iha loron veteranu nian maka hanesan halo marsa veteranu ba Maubai, semináriu ba estudante, lori mós jerasaun foun sira hodi hatene fatin istóriku ne’e tanba ema barak maka to’o agora seidauk hatene no misa agradesimentu,” nia akresenta.

Konsellu Veternu Viqueque prepara ona programa sira, maibé to’o ikus la konsege realiza tanba orsamentu laiha.

“Ha’u rasik maka telefone ba Konsellu Nasionál, maibé sira dehan osan laiha ne’ebé ami mós la halo buat ida. Maibé iha munisípiu Viqueque, iha postu administrativu Uatulari maka hakarak komemora maski osan laiha, tanba iha Uatulari mak saudozu sira-nia ruin rai iha Uma-mahon,” nia informa.

Veteranu ne’e konsidera, loloos tenki komemora loron nasionál veteranu, ne’ebé konsagra iha Lei númeru 3/2016.

“Iha kada tinan sempre komemora, maibé iha tinan ne’e maka la komemora, ha’u hanesan veteranu ida sente laran moras tanba loron ne’e veteranu nian, hafoin deside ona katak loron 03 marsu ne’e feridu nasionál. Tinan ne’e iha Eleisaun Prezidensiál, ho kestaun sira ne’e maka  Governu  altera komemorasaun loron 03 marsu no líder sira ne’ebé tama hotu ona partidu sira prepara ba kampaña,” nia dehan.

Komemorasaun loron nasionál veteranu, ninia abut bainhira Kay Rala Xanana Gusmão no Ma’Huno Bulerek Carathayano ‘Bucar’ reorganiza Luta Libertasaun Nasionál iha territóriu tomak iha loron 03 marsu 1981.

Selebrasaun dahuluk loron nasionál ne’e akontese iha tinan 2017, ne’ebé prezide hosi Prezidente Repúblika, Jenerál Taur Matan Ruak.

Nune’e, loron 03 marsu hetan duni rekoñesimentu hanesan loron nasionál veteranu, hanesan loron ne’ebé hala’o Konferénsia Nasionál FRETILIN dahuluk no harii Conselho Nacional da Resistência Timorense, hodi hili Xanana Gusmão hanesan Komisáriu Polítiku no Komandante FALINTIL.

Jornalista : Vitorino Lopes da Costa

Editora      : Julia Chatarina

iklan
iklan

Leave a Reply

iklan
error: Content is protected !!