VIQUEQUE, 03 marsu 2022 (TATOLI)– Kandidatu Prezidente Repúblika (PR) períodu 2022-2027, ho númeru sorteiu 08, Tenente Jerál Reformadu, Lere Anan Timur, hato’o promesa durante kampaña, bainhira povu fó fiar, tau prioridade haloot restu mortál iha fatin dignu iha territóriu tomak.
“Bainhira ha’u eletu sai Prezidente Repúblika, ha’u-nia prioridade dahuluk maka tenki haloot restu mortál saudozu sira-nia iha fatin dignu. Tanba tinan barak ona, maibé saudozu sira-nia ruin sei kontinua rai iha uma-mahon laran,” Kandidatu PR, Tenente Jenerál Reformadu Lere Anan, hateten, iha kampaña aberta, iha kampu futeból munisípiu Viqueque, kinta ne’e.
Notísia relevante: Governu rekolla ona restu mortál 40.000-resin iha territóriu nasionál
Lere nota mós katak, durante ne’e saudozu sira hosi munisípiu Viqueque, Lautém, Ainaro no munisípiu seluk to’o agora sei rai hela iha uma-mahon no saudozu balun nia ruin to’o ohin loron seidauk hetan.
“Ida-ne’e faz parte ba Prezidente Repúblika nia devér hodi haloot saudozu sira-nia ruin iha fatin dignu no di’ak. Tanba ne’e, ohin ha’u mai husu povu-nia domin mai ha’u, hodi fó apoiu ba ha’u-nia kandidata-an independente ba Prezidente Repúblika, maski ha’u hosi Partidu Frente Revolucionária do Timor-Leste Independente (FRETILIN),” nia hato’o.
Aleinde ne’e, Lere Anan Timur kompromete katak bainhira povu fó fiar ba nia, sei promove unidade, paz, estabilidade, justisa no lia loos ba povu.
“Ha’u hakarak justisa lia loos ba povu tomak no hakarak dezenvolve rai Timor Leste,” Kandidatu PR tenik.
Biban ne’e, nia lakohi fó promesa ba infraestrutura bázika ne’ebé povu sempre eziji, tanba kestaun ne’e hanesan Governu nia kompeténsia atu haree.
“Ha’u la promesa buat sira hanesan estrada, dada eletrisidade no bee-moos ba imi. Tanba ne’e devér Governu mak bele halo. Ha’u-nia kampaña lakoi fó promesa,” nia subliña.
Notísia relevante: Loron Veteranu, Lere husu misa agradesimentu-kari ai-funan iha Viqueque
Lere mós foka ba kumprimentu Konstituisaun bainhira eleitu sai Xefe Estadu, nu’udar sidadaun ne’ebé di’ak.
Tuir observasaun Agência TATOLI iha terrenu, nota katak durante simpatizante no apoiante Kandidatu PR Lere Anan Timur partisipa iha kampaña loron daruak, balun uza atributu partidu FRETILIN no balun uza atributu Partidu Libertasaun Populár (PLP).
Kampaña ne’e hahú iha tuku 14:00 no ramata tuku 16:20, ne’ebé hetan seguransa hosi Polísia Nasionál Timor Leste (PNTL) no observa direta hosi observadór internasionál hosi Uniaun Europeia (EU) no Komisaun Nasionál Eleisaun (CNE, sigla portugés).
Jornalista : Vitorino Lopes da Costa
Editora : Julia Chatarina
