MANUFAHI, 04 marsu 2022 (TATOLI) – Kandidatu Prezidente Repúblika (PR) husi Partidu Demokrátiku (PD) ho númeru sorteiu 16, Mariano Assanami Sabino, afirma nia kandidatura tanba hakarak atu kompleta no dignifika luta líder sira.
Mai ho mehi atu lori Timor-Leste sai solidáriu, fraternu no unidu banhira povu fó fiar iha eleisaun prezidensiál iha loron 19 fulan ne’e.
Kandidatu ne’e hakarak atu dignifika povu no rai ida ne’e ho hanoin loke Palásiu Presidensiál ne’e ba populasaun atu sira sente hola parte ba iha Estadu ida ne’e no rona sira-nian preokupasaun.
“Ha’u hamriik la’ós atu mai kompete, maibé atu kompleta de’it imi [líder sira] no kumpre Maubisse I no II. Razaun rua mak hakarak atu sai Xefe Estadu tanba imi hotu nia hakarak atu halo tranzisaun lideransa depois tinan 20 hodi dignifika maun sira-nian luta no futuru ba joven sira”, dehan iha kampaña aberta, iha Manufahi.
Assanami salienta se sai PR, lakohi atu rai ida ne’e monu ba grupu ka partidu ida nian. “Tanba ne’e mak Assanami hakarak hamriik atu halo buat ruma ba povu ida ne’e”.
Kandidatu ne’e mós lakohi atu ekonomia nasaun nian kontinua hakdasak, nune’e sei serbisu hamutuk ho Governu loke postu traballu hodi absorve dezempregu iha rai-laran.
“Bainhira sai Xefe Estadu la’ós atu veta de’it [orsamentu], maibé komunika ho Ezekutivu atu hadi’ak programa no planu Governu nian ho objetivu mak mellora povu nia moris”.
Sei halo mós dialógu ho institusaun, organizasaun, konfisaun relijioza, partidu polítiku no ema hotu atu kontribui ba rai no povu ida ne’e.
Atuál deputadu ne’e afirma tenke moderniza forsa defeza atubele kontrola rikusoin iha tasi, nune’e ema seluk labele aproveita. “Sai Xefe Estadu tenke hatuur loloos justisa Timor-Leste nian”, realsa.
Prezidente PD ne’e dehan tenke assegura ekonomia nasaun hodi tau orsamentu atu hadi’ak povu nia moris. Tau verba boot ba iha edukasaun hodi dezenvolve setór ne’e ho di’ak mós.
Assanami mai ho hanoin atu halo diplomasia ekonomia ho nasaun sira seluk hanesan Komunidade País Lian Portugés (CPLP) no iha Ázia Pásifiku.
“Tanba ne’e, husu atu serbisu di’ak liután hodi fó vitória ba númeru sorteiu 16. Ha’u-nian kompromisu ikus mak kuandu sai Xefe Estadu, sei husik hela kargu Prezidente Partidu”, nia kompromete.
Nune’e, Sekretáriu-Jerál PD, António da Conceição, nu’udar porta-voz kandidatu PR, dehan Assanami ema hotu nian no kuandu ukun iha tinan lima nia laran ko’alia povu nia interesse, la’ós partidu nian.
“Tanba ne’e husu atu vota ba kandidatu. Nia ema ne’ebé hatene sentidu Estadu. Assanami hakarak atu liberta povu ida ne’e. Assanami mós hakarak hatutan mehi Dom Boventura nia”.
Iha sorin seluk, Adriano do Nascimento ‘Loro Mau’, konselleiru ba kandidatu PR dehan Assanami nia mehi mak solidáriu, fraternu no unidu ba rai no povu ida ne’e.
Alénde ne’e, Prezidente Ekipa susesu kandidatura Assanami iha Manufahi, Domingos Rodrigues, husu ema hotu, organizasaun sira hodi fó vitória ba iha eleisaun ne’e.
Iha kampañs eleitorál ba daruak ne’e hetan partisipasaun másima husi militante no simpatizante iha munisípiu Manufahi.
Iha komísiu ne’e hetan supervizaun husi Komisaun Nasionál Eleisaun, Provedoria Direitu Umanu no Justisa no obervadór internasionál hodi haree prosesu hotu, inklui Lei Eleitorál nian hodi bele fó sussesu ba iha kampaña tinan ida ne’e.
Tuir observasaun PNTL Manufahi halo apreensaun ba motór tanba militante no simpatizante balun la uza kapasete no seluk tan.
Jornalista: Domingos Piedade Freitas
Editora: Maria Auxiliadora
