DILI, 04 marsu 2022 (TATOLI)–Diretór Downstream Autoridade Nasionál Petróleu no Minerál (ANPM), Nelson de Jesus, hateten, daudaun ne’e folin kombustível iha Timor-Leste sa’e tanba impaktu hosi folin merkadu mundiál.
“ANPM hanesan reguladora ba mina, haree folin kompustível daudaun sa’e tanba impaktu hosi folin merkadu mundiál hanesan hosi Supply Chain, ne’ebé hasa’e folin mina tanba mina mai hosi mina matak ne’ebé folin sa’e,” Diretór informa ba Agência TATOLI, iha Otél Novo Turismo, Bidau Lecidere, sesta ne’e.
Notísia relevante: Timor Gap aprezenta estudu projetu terminál importasaun armazenamentu kombustível
Aleinde ne’e, prosesu bainhira mina matak tenke lalin ba fatin ida no bele mós ba tau iha planta refenaria atu define protudu mina sira hanesan gazolina, gazoel, mina aviaun no seluk tan.
“Produtu sira ne’e hotu mak sei sai hosi fali refenaria no mai iha armajenamentu boot sira hanesan iha Ázia, nune’e hosi Singapura mak ema hotu ba sosa iha ne’ebá,” nia tenik.
Supply Chain envolve iha transportasaun hotu hanesan ró, nune’e kestaun hirak ne’e mak kontribui ba kombustível folin sa’e.
“Timor-Leste iha importadór boot rua de’it hanesan Pertamina Internasionál Timor-Leste no ETO, ne’ebé hatama mina mai. Rua ne’e mak iha armjenamentu mina no mina orijnál hosi nasaun Singapura, maibé dalaruma mós hosi Taiwan, konforme empreza sira hetan presu di’ak iha nasaun ne’ebé sira sosa,” nia esplika.
Iha sorin seluk, ANPM seidauk iha mekanizmu atu halo kontrolu folin mina iha rai-laran.
“Ita husik de’it ema fa’an tanba ita iha de’it empreza rua ne’ebé hatama mina no sira determina folin sa’e tanba hosi komponente oioin, hahú hosi folin mina, transportasaun, prosesamentu dokumentu, no tempu, buat sira ne’e hotu kontribui ba folin sa’e. Razaun seluk mós tanba impaktu hosi COVID-19,” nia informa.
Jornalista : Arminda Fonseca
Editora : Julia Chatarina
