Komisaun A suspende diskusaun espesialidade proposta lei Komisaun Funsaun Públika
DILI, 04 marsu 2022 (TATOLI)—Komisaun A trata asuntu Justisa no Konstituisional iha Parlamentu Nasionál suspende hela diskusaun iha faze espesialidade ba proposta lei Komisaun Funsaun Públika.
Prezidente Komisaun A, Joaquim dos Santos, hateten Komisaun A halo diskusaun iha espesialidade hafoin rona espesialista sira no autór ba projetu lei ne’e mai hosi Governu maibé deputadu sira la intende buat rua.
Notísia Relevante: PN aprova proposta lei Komisaun Funsaun Públika iha jeneralidade
Ida mak sistema ida agora ibrido ne’ebé funsiona hela ho lei Governu anteriór kria ho proposta foun Governu propoin ba Parlamentu Nasionál atu halo lei foun hodi revoga tiha lei ne’ebé uluk kria, entaun iha lei proposta foun ne’e mai ho pensamentu foun atu halo mudansa radikál ba sistema Komisaun Funsaun Públika muda ninia kontextu, konteúdu no natureza ne’e mak deputadu sira la konsege intende malu hetan konsensu iha ne’e ba mateira rua ne’e.
“Tanba ne’e mak Komisaun A seida’uk iha kondisaun atu husu aprovasaun ba deputadu sira kona-ba artigu sira. Entaun deputadu hosi grupu ida husu ba komisaun atu suspende lai diskusaun hafoin haree fila-fali hafoin eleisaun Prezidente Repúblika hetan ona kondisaun diskusaun mak ita ajenda fali,” Deputadu Joaquim dos Santos hateten ba Agéncia Tatoli iha Parlamentu Nasionál, sesta ne’e.
Nune’e, deputadu sira halo hela peskiza ka estudu iha ida-idak nia bankada hodi analiza profundu ba mateira sira hafoin ko’alia hodi diskute.
Antes ne’e, iha 08 fevereiru ne’e Parlamentu Nasionál liuhosi reuniaun plenária aprova proposta lei númeru 34/V(3a) Komisaun Funsaun Públika iha jeneralidade ho votu a-favór 32, kontra neen (6) no abstensaun ida (1) nune’e proposta lei pasa iha jeneralidade.
Proposta lei (PPL) ne’e iha artigu hamutuk 25 no kapítulu tolu, Kapítulu I kona-ba Dispozisaun Jerál ho nia artigu rua, Kapítulu II kona-ba Komisaun Funsaun Públika ho nia artigu 19 no Kapítulu III kona-ba Dispozisaun Finál ho nia artigu haat.
PPL ho objetu prezente lei estabelese rejime jurídiku aplika promosaun imparsialidade, isensaun no profisionlizmu funsaun públika hosi Komisaun Funsaun (KFP) Públika, dezigna mós hosi komisaun, no kona-ba natureza, kompeténsia, organizasaun no funsionamentu KFP define hosi dekretu-lei.
Iha ámbitu aplikasaun sujeita ba rejime jurídiku previstu iha prezente lei relasaun jurídika ba funsionáiu públiku, ajente no traballadór administrasaun públika sujeitu ba estatutu funsaun públika aprova hosi lei númeru 8/2004, 16 juñu, altera hosi lei númeru 5/2009, 15 jullu, independentemente vinkula servisu ho Estadu.
Deputadu Joaquim hateten, bainhira proposta lei ne’e iha ona aprovasaun finál mak sei revoga hotu lei númeru 7/2009, 15 jullu, ne’ebé kria Komisaun Funsaun Públika.
Maibé deputadu komisaun A sei halo diskusaun materia kle’an kada artigu iha faze espesialidade.
Antes ne’e, Ministru Prezidensia Konsellu Ministru (PCM, siglá protugés), Fidelis Manuel Leite Mangalhães, hateten inisiativa proposta ne’e hodi garante objetivu rua hanesan regra substantiva depedénsia no imparsialidade iha funsionamentu administrasaun públika ne’ebé kompeténsia Parlamentu iha artigu 95 númeru 1 konstituisaun.
Kompeténsia lejislativa eskluziva Governu kona-ba propria organizasaun no funsionamentu inklui matéria barak ne’ebé trata iha atuál lei Komisaun Funsaun Públika.
“Proposta lei kona-ba Komisaun Funsaun Públika ne’e esklarese nia atribuisaun KFP no kompeténsia órgaun tanba dadaun ne’e iha lei vijente la konsege esklarese didi’ak atribuisaun KFP,” nia esplika.
Fidelis hateten, objetivu seluk mak hakarak reforsa kompeténsia KFP garante iha matéria regulatória, kontrola legalidade, méritu no funsaun hanesan entidade indepedente.
Notísia Relevante: PN baixa proposta-lei Komisaun Funsaun Públika ba Komisaun A
Jornalista : Nelson de Sousa
Editór : Cancio Ximenes
