DILI, 04 marsu 2022 (TATOLI)–Governu liuhosi Ministériu Finansa (MF), sesta ne’e, realiza workshop kona-ba Lei Grande Opsaun Planu ba membru Governu sira.
“Atividade ne’e hanesan orientasaun Primeiru-Ministru ba Ministériu Finansa, ho partisipasaun membru Governu hotu hodi bele hetan informasaun kona-ba Lei Enkuadramentu Orsamentu Jerál Estadu (OJE) no Jestaun Finansa Públika foun, ne’ebé mak foin daudaun hetan promulgasaun hosi Prezidente Repúblika iha fulan kotuk, sei substitui Lei Orsamentu Jestaun Finanseira tuan, ne’ebé hahú kedas tinan 2009 to’o agora,” Diretór Jerál Planeamentu no Orsamentu hosi MF, José Alexandre de Carvalho, informa iha Auditorium MF, Aitarak-laran.
Nune’e, iha elaborasaun OJE tuir mai, iha faze boot hanesan elebora Lei Grande Opsaun Planu, ne’ebé ninia kontíudu kona-ba prioridade Governu ba OJE 2023.
“Medida sira ne’e kontempla iha Lei Grande Opsaun Planu, ne’ebé tuir kalendáriu sei aprezenta ba Parlamentu Nasionál (PN) iha loron 10 maiu 2022 hodi dikute,” nia akresenta.
Notísia relevante: PN aprova proposta-lei enkuadramentu orsamentál iha finál global
Bainhira aprova ona lei ne’e mak sei vinkula Governu, nune’e iha preparasaun orsamentu, tanba prioridade labele muda ona, entidade responsável sira só halo de’it distribuisaun des-agregadu ba entidade orsamentál sira ne’ebé mak hola parte ka tama iha perimetru orsamentu, atu nune’e sira bele hetan tetu hira hodi implementa prioridade medida sira ne’ebé kontempla ona iha Lei Grande Opsaun Planu.
Iha workshop ne’e, faze seluk ne’ebé MF aprezentasaun ba membru Governu sira mak kona-ba estratejia atu elabora lei ne’e.
“Estratejia mak ita fó hatene ba sira katak ita presiza identifika planu medida sira ne’ebé kontempla iha planu estratejia dezenvolvimentu nasionál, ne’ebé aliñadu ho programa Governu no planu estratéjiku setór seluk ka dokumentu seluk, ne’ebé mak aprova iha Konsellu Ministru. Ita estrai medida sira hotu nu’udar kolesaun dadus ida, nune’e bele tau hamutuk hodi identifika ninia urjente no ninia importánsia, ikus mai hetan ninia prioridade nasionál,” Diretór ne’e esplika.
Molok tama iha workshop ne’e, iha semana kotuk MF fahe informasaun téknikamente ba liña ministeriál kona-ba Lei Grande Opsaun Planu, nune’e molok tama atividade ohin, partisipante sira hetan ona informasaun.
“Agora ita hein de’it simu fali hosi sira, nune’e bele halo análiza ba lista sira ne’e, tanba diferensa kona-ba Lei Grande Opsaun Planu mak ita sei iha jornál ida ba planeamentu no ida ba orsamentu,” nia tenik.
Jornál ba Planeamentu ne’e ho objetivu finál mak atu hetan Lei Grande Opsaun Planu, ne’ebé define prioridade, hafoin haruka ba Parlamentu Nasionál bainhira hetan aprovasaun hosi MF kona-ba alokasaun orsamentu bazeia ba prioridade.
Jornalista : Arminda Fonseca
Editora : Julia Chatarina
