Orsamentu la sufisiente fó impaktu ba produsaun agrikultura iha Covalima
COVALIMA, 04 marsu 2022 (TATOLI)–Diretór Servisu Agrikultura Munisípiu Covalima, Domingos Gusmão hateten, Governu aloka orsamentu ba área agrikultura la sufisiente fó impaktu ba produsaun agrikultura iha Covalima tanba rai ka natar barak mak abandona.
“Rai barak kontinua abandona, alokasaun orsamentu ba munisípiu la sufisiente, aloka orsamentu rubrika bens servisu no laiha orsamentu kapital menór no kapitál dezenvolvimentu, ita labele halo buat barak. Entaun ita hala’o de’it polítika hosi ministériu nian,” Domingos Gusmão hateten ba Agência Tatoli, iha salaun administrasaun Kampung Baru, sesta ne’e.
Atu hasa’e produsaun agrikultura iha munisípiu hodi utiliza rai ne’ebé abandona, ida-ne’e sai preokupasaun ida tanba xave mak tenke aloka orsamentu sufisiente hodi hasa’e produsaun agrikultura liuhosi halo estensaun ba área kultivu sira.
Preokupasaun atu hasa’e produsaun no produtividade agrikultura ne’e ninia xave mak Governu tenke prevee orsamentu ne’ebé sufisiente no tenke utiliza rai ne’ebé iha, hodi hasa’e produsaun liu-liu intensifika natar no toos, no uza konservasaun agrikultura hodi habokur rai.
Atu redús importasaun foos hosi rai-li’ur presiza hasa’e produsaun iha rai-laran no tenke esplora área kultiva sira-ne’ebé durante ne’e ladún tau importánsia hodi envolve agrikultór joven sira.
“Ha’u-nia observasaun atu redús importasaun ita presiza hasa’e produsaun iha rai-laran, entaun atu hasa’e produsaun iha rai laran ne’e, ita tenke esplora ona área kultivu ne’ebe durante ne’e ita ladún tau importánsia, ita presiza envolve agrikultor joven sira,” nia dehan.
Atu redús importasaun, presiza envolve rekursu ne’ebé iha liu-liu agrikultór ho idade nurak sira hodi utiliza rai ne’ebé mak abandonadu atu hasa’e produsaun agrikultura iha rai Covalima.
Bazea ba dadus hosi agrikultura iha munisípiu Covalima, postu administrativu Zumalai iha suku Raimea, bairru Oebaba, suku Tashilin no postu administrativu Suai Vila, iha suku Suai Loro hanesan suku potensiál ba natar.
Jornalista : Celestina Teles
Editor : Cancio Ximenes
