MANATUTO, 05 marsu 2022 (TATOLI)–Kandidatu Prezidente Repúblika (PR) ho númeru sorteiu 03, Maria Ángela Freitas da Silva, hala’o ninia atividade kampaña, sábadu ne’e, iha postu Manatuto villa, munisípiu Manatuto, ho tipu komísiu no fahe brosura ne’ebé ho ninia prioridade sira
Biban ne’e, nia hato’o sentimentu triste ho kondisaun negosiante iha merkadu Manatuto villa tanba fa’an produtu iha loron manas no tuur iha estrada ninin.
“Manatuto hanesan munisípiu ne’ebé potensiál, maibé ohin loron Estadu la tau-matan, realidade ida maka merkadu munisipál de’it laiha, espasu ba negosiante sira atu hala’o sira-nia vida negósiu tuur de’it iha rai no habai-an iha loron manas. Tanba ne’e, bainhira eleita nu’udar Xefe Estadu, ha’u sei tau-matan ba kestaun sira ne’e, tanba Timor-Leste ukun-an tinan 20 ona, maibé negosiante sira nafatin fa’an sasán iha fatin la dignu,” Kandidatu PR Ángela Freitas hateten hafoin fahe pamfletu ba negosiante sira iha merkadu Manatuto villa.
Notísia relevante: Kampaña iha Baucau, Ángela Freitas tau importánsia iha setór produtivu
Biban ne’e, nia nota katak, tinan bailoron kondisaun hanesan de’it maski Manatuto iha área potensiál barak.
“Tanba ne’e, atu hasa’e produsaun tenki investe iha área agrikultura liuliu hare, peska, no turizmu,” nia akresenta.
Nune’e, Kandidatu PR independente ne’e konvida sidadaun hotu atu akompaña situasaun rai-laran hodi tetu hili didi’ak iha Eleisaun Prezidensiál iha loron 19 marsu 2022.
Iha biban hanesan, Negosiante modo iha merkadu, Albina dos Reis Alves, kompromete sei hili Kandidatu PR Ángela Freitas, maibé husu atu tau-matan kria kondisaun di’ak ba negosiante sira.
“Ha’u bele vota ona ba Ángela Freitas, maibé husu atu hadi’a kondisaun merkadu Manatuto hodi ami bele fa’an produtu sustenta ami-nia família,” nia hato’o esperansa.
Durante atividade kampaña iha Manatuto, Kandidatu PR ne’e la hetan observasaun hosi Komisaun Nasionál Eleisaun (CNE, sigla portugés), observadór internasionál no Polísia Nasionál Timor-Leste (PNTL), hanesan iha kampaña seluk ne’ebé realiza ona.
Kampaña hahú tarde
Iha sorin seluk, Kandidatu PR Ángela Freitas hahú kampaña iha munisípiu Manatuto tarde tanba transporte ne’ebé utiliza a’at.
“Ami iha problema ho transporte, mákina karreta ladi’ak, ne’ebé hanesan kondisaun reál ne’ebé akontese. Ita presiza mákina foun, labele kontinua nafatin ho mákina fruzen ona atu lori pasajeiru sira seidauk to’o distinasaun ita patina iha dalan klaran, ida-ne’e maka daudaun akontese ba ami-nia ekipa. Tanba ne’e maka ami halo kampaña tarde,” nia informa.
Ba kestaun ne’e, Ángele Freitas husu deskulpa ba apoiante no mídia sira ne’ebé akompaña atividade kampaña.
“Maski nune’e, ami nafatin iha responsabilidade hodi transmite vizaun no misaun ba povu,” nia afirma.
Iha sorin seluk, Prezidente CNE Manatuto, Paulino Soares, hateten, bainhira ekipa CNE to’o iha fatin ne’ebé prevee ona iha oráriu maibé Kandidatu PR ho ekipa seidauk iha, nune’e koko konfirma ho ekipa susesu via telefónika maibé telemóvel desligadu (mate).
“Observadór Uniaun Europeia mós husu ha’u, karik iha númeru kontaktu ekipa susesu nasionál nian de’it mak iha, munisipál nian laiha. Nune’e, ami koko liga ba ekipa susesu nasionál maibé númeru telemóvel mate, ne’ebé bainhira liu ona meiu dia tuku 12:00 mak sira la hala’o kampaña, signifika la konsege, ho ida-ne’e ami sei haree fali ho lei ne’ebé iha hodi solusiona aktu ne’e,” Paulino haktuir.
Tuir oráriu ne’ebé aprova hosi CNE, kandidatu PR, Ángela Freitas, sábadu ne’e sei hala’o kampaña iha postu Manatuto villa, hahú tuku 10:00 dadeer to’o tuku 18:00 lorokraik.
Jornalista : Antónia Gusmão
Editora : Julia Chatarina
