Martinho Gusmão prioritiza infraestrutura iha setór edukasaun
VIQUEQUE, 05 Marsu 2022 (TATOLI) – Kandidatu Prezidente Repúblika ho númeru sortru 13, Martinho Germano da Silva Gusmão, prioritiza infraestrutura eskola sira iha territóriu nasionál.
“Povu tomak fó fiar mai ha’u sai prezidente, programa prioridade infraestrutura ba eskola sira iha territóriu nasionál. Tanba ita haree kondiasaun infraestrutura edukasaun iha territóriu laran kuaze kondiasaun aat,” Kandidatu Martinho Germano da Silva Gusmão, hala’o kampaña eleitorál iha kampu futébool Beloi, sábadu ne’e.
“Ita hamutuk halo revolusaun ba edukasaun, ha’u maka kaer komandu hodi halo revolusaun ba edukasaun. Maibé, ha’u hakarak imi identifika eskola sira-ne’e iha imi-nia aldeia ka iha suku hodi haree kondiasaun ladi’ak, imi halo levantamentu lori ba ha’u-nia meza, hodi ha’u luta ba osan edukasaun hasa’e ba 10%, 15% to’o 20% hodi halo revolusaun edukasaun no halo infraestrutura eskola sira,” nia katak.
Nia dehan, kuaze tinan 20 osan ba edukasaun hahú 5% to’o 7% de’it, kompara iha mundu Timor Leste maka investe ba edukasaun ki’ik-liu.
“Estudante sai kualidade ita presiza hasa’e kualidade profesór sira-nian nomós hasa’e saláriu profesór sira-nian. Ha’u hakarak profesór no estudante sira atu hetan kualidade moris nian,” nia akresenta.
Koordenadór Partidu Unidade Dezenvolvimentu Demokrátiku (PUDD) Munisípiu Viqueque, Apolinário Soares, hateten, kandidatu PUDD ho númeru sorteiu 13 ho programa tolu revolusaun edukasaun, hatuur justisa no harii kultura dame.
“Hosi programa tolu ne’ebé ita-nia kandidatu lori furak tebes. Tán ne’e simpatizante sira orienta ita idak-idak ninia família hili númeru sorteiu 13,” nia sujere.
Jornalista : Vitorino Lopes da Costa
Editór : Evaristo Martins
