VIQUEQUE, 06 marsu 2022 (TATOLI)-–Kandidatu Prezidente Repúblika (PR) ba períodu 2022-2027, ho númeru sorteiu 12, Virgílio da Silva Guteres, kompromete bainhira povu fó fiar, sei eleva Sekretaria Estadu Juventude no Desportu (SEJD) sai ministériu hodi tau matan ba joven sira.
“Ha’u kandidatu ba Prezidente Prepúblika reprezenta juventude, hosi ha’u-nia kandidatu ne’e bainhira povu fó fiar mai ha’u ba ukun, ha’u sei rekomenda ba Governu hodi eleva Sekretaria Estadu Juventude no Desportu sai ministériu ida hodi tau matan ba joven sira,” Kandidatu PR Virgílio da Silva Guteres, hateten iha ninia diálogu ho simpatizante sira, iha aldeia Cabira-oan, suku Caraubalho, postu adiministrativu Viqueque Villa, domingu ne’e.
Notísia relevante: Kandidatu Virgílio Guterres no Constáncio Pinto rejista iha Tribunál Rekursu
Kandidatu PR independente ne’e dehan, bainhira SEJD sai ministériu, presiza mós haree ba alokasaun orsamentu ne’ebé sufisente atu tau ba dezenvolvimentu juventude ninian.
“La’ós ita tau Sekretaria Estadu Juventude no Desportu alokasaun osan kiik liu, tinan 20 ona ita haree iha munisípiu sira kampu futeból sei limitadu tebes, oinsá maka joven sira bele dezenvolve talenta iha área desportiva,” nia akresenta.
Nune’e mós, nia enkoraja joven Viqueque-oan sira ne’ebé envolve iha grupu arte marsiál sira, uza talentu ba defende-an, família no defende nasaun Timor Leste.
Diálogu ne’e partisipa hosi simpatizanti sira hosi suku Caraubalu, ho totál hamutuk na’in-25-resin, ne’ebé maka rona prioridade hosi Kandidatu PR no hetan supervizasaun hosi Komisaun Nasionál Eleisaun (CNE, sigla portugés), Provedoria Direitu Umanu no Justisa (PDHJ, sigla portugés) no hetan seguransa hosi Polísia Nasionál Timor Leste (PNTL).
Hafoin ramata diálogu iha Viqueque villa, kontinua halo diálogu dialogu iha suku Craras, hahú tuku 10:00 to’o 18:00 ho tipu kampaña diálogu.
Tuir observasaun Agência TATOLI, diálogu la’o ho hamatek no ekipa susesu sira fahe fampletu ba simpatizante sira ne’ebé partisipa iha diálogu.
Tuir oráriu ofisiál hosi CNE, iha loron 07 marsu, kandidatu independente ne’e sei hala’o kampaña tipu diálogu iha munisípiu Lautém, hahú tuku 15:00 to’o 18:00 no hahú fali iha Tutuala, hahú tuku 10:00 to’o 12:00.
Jornalista : Vitorino Lopes da Costa
Editora : Julia Chatarina
