VIQUEQUE, 07 marsu 2022 (TATOLI)–Diretór Komisaun Nasionál Eleisaun (CNE, sigla Portugés) Viqueque, Honorio Cruz da Silva, rekoñese, munisípiu iha zona leste ne’e seidauk iha fatin própriu hodi realiza kampaña.
“Iha munisípiu Viqueque, ita seidauk iha fatin própriu hodi realiza atividade kampaña eleitorál. Tanba ne’e, ita nafatin uza kampu rua ne’ebé besik liu areadór eskola sira,” Diretór CNE informa ba Agência TATOLI, iha ninia knaar fatin, Beloi, segunda ne’e.
Notísia relevante: Kampaña iha Viqueque, Armanda Berta promete promove unidade nasionál
Maski nune’e, molok tama ba kampaña, parte CNE halo koordenasaun no fó karta formál ba parte diretór eskola sira ne’ebé besik kampu futeból Viqueque villa no kampu futeból Beloi.
Kampu futeból Beloi besik Eskola Ensinu Báziku Filiál (EBF) 01 no kampu futeból Viqueque villa besik Eskola Sekundáriu Santo Estevão no Igreja Imaculada.
“Tanba ne’e, bainhira ita realiza kampaña, diretór sira kompriende situasaun ida-ne’e. Ha’u hanoin situasaun sira ne’e la’ós CNE ninia kompeténsia de’it, maibé parte autoridade munisípiu nian hotu atubele serbisu hamutuk ho CNE hodi kria fatin própriu, nune’e atividade kampaña bele realiza iha fatin própriu ida hodi la prejudika prosesu aprendizajen iha eskola,” nia akresenta.
Jornalista : Vitorino Lopes da Costa
Editora : Julia Chatarina
