DILI, 07 marsu 2022 (TATOLI)–Asesór Prinsipál Prezidente Sentru Lojístiku Nasionál (CLN, sigla portugés), Joanico Gonçalves, hateten, prosesu akizasaun foos tonelada 5.000 sei to’o iha Timor-Leste iha inísiu abríl 2022.
“Foos ne’e sosa hosi nasaun Vietname, ne’ebé antes ne’e tuir planu atu sosa hosi nasaun Tailándia tanba akordu entre Governu Timor-Leste ho Governu Tailándia, maibé prosesu seidauk realiza, entaun haree ba situasaun emerjénsia, Sentru Lojístiku Nasionál fó fali oportunidade ba empreza timor-oan sira mak halo akizasaun,” Joanico Gonçalves informa ba Agência TATOLI, iha ninia knaar fatin, segunda ne’e.
Notísia relevante: CLN apoiu foos saka 200 ba vítima inundasaun iha Don Bosco
Daudaun ne’e empreza tolu hanesan Charly unipesoal Lda, Esmelia unip Lda, no Santos unip,Lda mak halo akordu ho Vietname atu hatama foos.
“Iha tempu badak kompañia tolu ne’e sei halo letter of credit ho Banku Nasionál Komérsiu Timor-Leste (BNCTL, sigla portugés) no haruka ba Vietname, ne’ebé sei inísiu abril foos to’o ona Timor-Leste” nia akresenta.
Foos ne’e sei uza hanesan alternativa tanba daudaun ne’e hare kulit iha armazen Maliana no Natarbora sei sufisiente tanba iha tonelada 535, nune’e bainhira situasaun difísil CLN bele uza hare kulit sira.
“Hare kulit ne’ebé iha, ami garante katak bainhira akontese situasaun difísil ruma ami bele dulas lalais tanba ita iha mákina dulas hare no loron ida bele dulas to’o tonelada ualu,” nia tenik.
Antes ne’e, iha jullu 2020, Governu Timor-Leste halo akizisaun foos tonelada 30.000 ho kustu millaun $15 hosi vietname, ne’ebé inisiativa ne’e tama iha pakote sosiu-ekonómiku hodi rezerva iha situasaun emerjénsia no garante stock nasionál atubele kompensa bainhira foos menus durante surtu COVID-19.
Jornalista : Arminda Fonseca
Editora : Julia Chatarina
