COVALIMA, 07 marsu 2022 (TATOLI)—Komisaun Nasionál Eleisaun (CNE, sigla portugés), identifika funsionáriu públiku barak partisipa iha kampaña eleitorál liu-liu iha kampaña kandidatu Prezidente Repúblika, Francisco Guterres Lú Olo, ba dala-lima (5) ne’ebé realiza iha munisípiu Covalima.
Diretór CNE Munisípiu Covalima, Hermenegildo de Sena hateten, oras ne’e daudaun CNE iha hela terreñu hodi halo observasaun kampaña eleitorál ho númeru sorteiu 6 nian ne’e, CNE deteta funsionáriu públiku balun tuir kampaña iha oras servisu nian no sei relata ba komisáriu Komisaun Funsaun Públiku (KFP).
“Daudaun ne’e ami haree hela funsionáriu públiku sira balun ne’ebè mak partisipa iha kampaña, ami toma nota hodi relata ba iha komisáriu Funsaun Públiku hodi buka solusaun,” Diretór CNE Covalima ne’e hateten ba jornalista sira hafoin halo observasaun kampaña iha Kampu Ladi, segunda ne’e.
Bazea ba estatutu Komisaun Funsaun Públiku bainhira funsionáriu sira hola parte iha kampaña eleitorál, sira hato’o pedidu ba Komisaun Funsaun Públika (KFP), tenke husu pedidu lisensa anuál, lisensa lahó vensimentu no lisensa espesiál.
“Funsionáriu sira hato’o pedidu ba iha KPF, ami CNE sempre iha dokumentu maibé durante ne’e ami la asesu dokumentu ba funsionáriu sira-ne’ebè mak hato’o pedidu lisensa ba KFP,” nia dehan.
Kampañia dala-lima ne’ebé kandidatu ho númeru sorteiu 6 ne’e hala’o, hetan obsevasaun hosi ofisiál CNE ne’ebé mai hosi postu administrativu Fohorem, Fatutulik no Suai Vila.
Tuir CNE nia observasaun, funsionáriu ne’ebé mak partisipa iha kampaña durante oras servisu mak hanesan funsionáriu sira hosi administrasaun munisípiu Covalima hanesan diretór sira, servisu edukasaun munisípiu Covalima, administradór Munisípiu Covalima no postu administrative sira.
Preparasaun ba kampaña eleitorál, CNE halo rekrutamentu ba ofisiál CNE hamutuk 103 hodi halo obserbasaun durante kampaña eleitorál.
Notísia Relevante: Lú-Olo reeleitu ba PR sei hametin relasaun institusionál
Jornalista : Celestina Teles
Editór : Cancio Ximenes
