DILI, 07 marsu 2022 (TATOLI)–Diretór Ezekutivu Ajénsia Nasionál Avaliasaun Akreditasaun Akadémiku (ANAAA), Edmundo da Silva Viegas, relata katak Instituisaun Ensinu Superiór ualu ho polo haat simu ona rezultadu avaliasaun, maibé Institutu Profisionál de Canossa (IPDC) mak la satisfáz ho rezultadu.
“Sira hato’o reklamasaun hodi husu ANAAA altera rezultadu iha pontuasaun. Ita simu reklamasaun Canossa tanba sira la satisfáz ho rezultadu avaliasaun ne’ebé ita fó sai ona. Maibé hafoin ita hasoru malu tiha iha loron sesta, 25 fevereiru, ikus mai Madre Reitora ho ninia ekipa simu rezultadu ne’e, einbora iha alterasaun kona-ba pontuasaun,” Diretór Ezekutivu ANAAA hateten ba Agência TATOLI, iha edifísiu ANAAA, Balide, segunda ne’e.
Notísia relevante: MESSK seidauk públika rezultadu avaliasaun kursu 25 hosi ANAAA
Tuir Diretór Ezekutivu ANAAA, avaliasaun ne’ebé sira halo ba instituisaun ualu ho polo haat tama iha segundu períodu, hafoin sira avalia kursu 25 iha instituisaun Ensinu Superiór hitu.
Rezultadu avaliasaun instituisaun 12 ne’ebé aprezenta ona iha enkontru Konsellu Diretivu ANAAA iha janeiru liubá hetan mós aprovasaun.
Reklamasaun IPDC nian fó dalan ba ANAAA hodi halo alterasaun ba pontuasaun ne’ebé deside ona ba instituisaun refere, maibé klasifikasaun ne’ebé deside ona ba institutu ne’e kontinua mantein ho valór B.
“Pontuasaun IPDC antes ne’e hetan 86, maibé ANAAA halo fali alterasaun hodi hasa’e ba 87. Sira-nia klasifikasaun ho valór B mantein nafatin, tanba instituisaun ida atu hetan klasifikasaun A tenke atinje pontuasaun ho valór 90,” nia akresenta.
Alterasaun ne’ebé Ajénsia halo ona hodi responde reklamasaun IPDC nian sei aprezenta filafali iha semana ne’e liuhosi enkontru Konsellu Diretivu hotu tiha maka sei aprezenta filafali ba Ministru Ensinu Superior Siénsia no Kultura (MESSK) no ikus mai hetan aprovasaun.
Enkuantu, kursu 25 hosi instituisaun hitu ne’ebé maka ANAAA avalia ne’e daudaun hetan ona aprovasaun hosi MESSK no hein de’it atu halo publikasaun iha jornál repúblika.
Jornalista : Tomé Amado
Editora : Julia Chatarina
