DILI, 07 marsu 2022 (TATOLI)–Ministériu Edukasaun Juventude no Desportu (MEJD) laiha kbiit atu apoiu indemnizasaun ba komunidade ne’ebé to’o agora okupa hela fasilidade eskola, maibé kontinua kolabora ho Ministériu Justisa (MJ) no Diresaun Nasionál Terra Propriedade (DNTP) atu buka solusaun ba okupante sira.
“Atu hasai komunidade ne’e kompeténsia Ministériu Justisa no Diresaun Nasionál Terra Propriedade. Sira mak sei hasai notifikasaun oinsá atu trata prosesu lori fila komunidade ba fali fatin ne’ebé deside ona. Ami-nia knaar kontinua halo aprosimasaun,” Diretór Jerál Administrasaun no Finansa, Antoninho Pires hosi MEJD, relata ba Agência TATOLI, iha edifísiu Villa Verde, segunda ne’e.
Nia haktuir, iha tinan hirak liu ba kotuk, DNTP hasai ona notifikasaun ba komunidade ne’ebé okupa areadór eskola Bidau Akadiru hun no husu atu hamamuk fasilidade eskola hodi fó oportunidade ba eskola atu halo ninia atividade maibé to’o agora la realiza.
Notísia relevante: Abitante 52 kontinua okupa resintu Eskola ESJ 10 Dezembru Comoro
“Ministériu Justisa no Diresaun Nasionál Terra Propriedade tenke nafatin halo esforsu tanba prosesu sira hanesan ne’e Ministériu Edukasaun Juventude no Desportu laiha kompeténsia. Agora atu transporta komunidade ne’e parte rua maka deside ona ninia prosesu,” nia akresenta.
Enkuantu, Diretór Servisu Edukasaun Dili, Carlito da Silva, hateten, to’o agora nia halo hela esforsu hodi halibur dadus eskola hira mak komunidade okupa atu buka solusaun no rezolve tanba eskola iha Dili hamutuk 16 mak tama ona iha planu reabilitasaun no konstrusaun.
“Ita halibur ona dadus, hafoin buka solusaun atu nune’e bainhira rezolve karik dala-ida de’it, ne’ebé ha’u husu ona ba Xefe suku no inklui Diretór no Koordenadór eskola sira atu haree asuntu ne’e,” nia tenik.
Jornalista : Tomé Amado
Editora : Julia Chatarina
