VIQUEQUE, 08 marsu 2022 (TATOLI)-–Kandidatu Prezidente Repúblika (PR) períodu 2022-2027 ho númeru sorteiu 10, Antero Benedito da Silva, hateten, bainhira hetan fiar hosi povu, kompromete sei kolabora ho Governu ba alokasaun orsamentu hodi tau prioridade ba estrada.
“Ha’u-nia prioridade ida maka estrada iha munisípiu Viqueque. Tanba ita haree kondisaun estrada iha ne’e barak mak a’at. Ita presiza dalan di’ak hodi povu agrikultór sira bele lori produtu ba asesu merkadu,” Kandidatu PR Antero dehan durante diskursu iha kampaña tipu diálogu populár, iha aldeia Mane-haat, suku Caraubalo, postu administrativu Viqueque villa, munisípiu Viqueque, tersa ne’e.
Notísia relevante: Sai Xefe Estadu, Antero propoin ba Governu fó prioridade ba agrikultura
Durante halo viajen, Kandidatu independente ne’e nota katak estrada Viqueque ho kondisaun a’at tebes inklui estrada ligasaun Viqueque bá Same.
“Ita haree zona kosta súl ne’e produsaun agrikultór di’ak, komunidade kuda produtu hanesan batar no hare inklui hakiak animál,” nia akresenta.
Haree mós katak estrada ligasaun ponte Dilor no Welolo kotu, maibé to’o agora Governu seidauk normaliza, ne’ebé tempu udan komunidade liu ladi’ak.
“Ha’u haree estrada ba zona kosta súl ne’e prinsipál ba ita-nia komunidade hodi mobiliza produtu lokál ba merkadu, maibé dalan a’at maka barak,” Antero tenik.
Aleinde ne’e, prioridade seluk hosi kandidatu númeru sorteiu 10 ne’e mak sei reforsa Governu halo investimentu iha setór edukasaun, hasa’e saláriu funsionáriu públiku, setór agrikultura no hametin unidade nasionál.
Iha fatin hanesan, ekipa susesu nasionál Kandidatu PR, Mateus Fernanaes, hateten, maski ukun-an iha tinan barak maibé dalan iha munisípiu Viqueque kontinua a’at.
“Tanba ne’e, ita hamutuk lori Kandidatu Prezidete Repúblika Antero Benedito hodi hamutuk ho Governu hadi’a dezenvolvimentu iha Timor Leste,” nia akresenta.
Diálogu ne’e hahú tuku 08:00 to’o 18:00, ne’ebé partisipasaun hosi simpatizante sira, supervizasaun hosi observadór internasionál hosi Uniaun Europeia (UE), Komisaun Nasionál Eleisaun (CNE, sigla portugés) no Provedoria Diretu Umanu no Justisa (PDHJ, sigla portugés) no hetan seguransa másima hosi Polísia Nasionál Timor Leste (PNTL).
Atividade ne’e la’o ho ambiente hakmatek no ekipa susesu sira fahe pamfletu ba simpatizante sira.
Jornalista : Vitorino Lopes da Costa
Editora : Julia Chatarina
