DILI, 09 marsu 2022 (TATOLI)—Diretór Dirasaun Nasionál Transporte no Terrestre (DNTT), António da Costa, informa iha tinan ne’e DNTT sei halo manutensaun ba semáforu ne’ebé avaria iha dalan protokolu kapitál Dili.
“Ami sei halo manutensaun ba semafóru sira-ne’ebé avaria iha kapitál Dili, ne’ebé daudaun ne’e ami halo hela planu ezekusaun, hanesan dokumentu hotu-hotu ami prepara hotu ona no ami haruka ba Ministériu iha Dirasaun Nasionál Aprovizionamentu atu loke konkursu. Karik sé mak manán mak foin hadi’a semáforu hirak ne’e,” António da Costa hateten ba Agência Tatoli, iha nia knaar-fatin, Dili, kuarta ne’e.
Nia informa, semáforu iha Dili ne’e iha fatin haat (4) mak avária hanesan iha Palásiu Prezidente, Vila Verde iha área Katedrál, Eis ANZ iha área Lecidere no Hospitál Nasionál Guido Valadares Bidau Tokoh Baru.
“Ita-nia semafóru iha Hospitál Bidau Tokoh Baru la’ós avaria, maibé ami-nia tékniku mak taka tanba momentu ne’ebá iha mudansa ba jalur, tanba ne’e semáforu iha Bidau Tokoh Baru taka tiha. Maibé, ita-nia semáforu iha ANZ ne’e lampu mak la di’ak duni,” nia informa.
Enkuantu, semafóru iha área Vila Verde Katedrál nian ne’e momentu ne’ebá ema mak xoke, ne’ebé kazu ne’e agora sei iha hela Polísía Nasionál Timor-Leste (PNTL), maibé semáforu iha área Palásiu Prezidente kondisaun lampu mak la di’ak duni.
Tanba ne’e, nia dehan, DNTT hein prosesu sira0ne’e hotu, karik sé mak manan iha konkursu ne’e nia mak sei sosa ekipamentu sira-ne’e hodi mai hadi’a.
Tuir dadus hosi DNTT katak semáforu iha Dili laran hamutuk 12 kompostu hosi Bidau Lecidere, Estádiun, Ministériu Justisa, Eletrisidade Timor Leste. EP. (EDTL), Colmera, Katedrál, Jardim 05 de maio, Palácio Prezidente, Timor Plaza, Delta, Bidau Tokoh Baru no Bemori.
Antes ne’e, Orsamentu Jerál Estadu (OJE) 2022 ba Ministériu Transporte no Komunikasaun (MTK) ho montante $8.976.153 ne’ebé hetan ona aprovasaun iha Parlamentu Nasionál (PN).
Orsamentu $8.976.153 ne’e fahe ba kategoria saláriu no vensimentu $2.042.126, bens no servisu $4.272.906, kapitál menór laiha, kapitál dezenvolvimentu $1.398.531 no transferénsia públika $1.162.500.
Alende ne’e, verba alokadu sei finansia sub-programa 12, atividade 41 no programa lima hanesan telekomunikasaun $1.707.936, transporte $2.543.669, boa governasaun no jestaun institusionál $4.548.939, portu $55.582 no igualidade jéneru no inkluzasaun sosiál hamutuk $20.000.
Jornalista : Nelia Fernandes
Editór : Cancio Ximenes
