DILI, 09 marsu 2022 (TATOLI)–Governu liuhosi reuniaun ezekutivu, iha kuarta ne’e, aprova Projetu Rezolusaun Governu hodi deside loron 14 dezembru nu’udar loron nasionál ba Tais.
Proposta ne’e aprezenta hosi Ministru Ensinu Superiór, Siénsia no Kultura (MESSK), Longuinhos dos Santos.
“Konsellu Ministru aprova mós Projetu Rezolusaun Governu kona-ba loron nasionál Tais, ne’ebé estabelese ona hosi Parlamentu Nasionál, sei komemora kada tinan iha loron 14 dezembru,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun Konsellu Ministru, iha Palásiu Governu.
Notísia relevante: MTCI sei realiza kompetisaun soru tais ba jerasaun foun sira
Rezolusaun Governu ne’e determina katak loron nasionál Tais sei selebra hanesan ho realizasaun atividade selebratória, rekreativa no informativa iha relasaun ho protesaun no valorizasaun ba Tais.
Tinan ne’e, prevee orsamentu $100.000 atu fó apoia ba grupu kulturál sira, ne’ebé fó prioridade liubá grupu soru tais sira tanba loron 14 dezembru 2021, Tais hetan nomeasaun sai hanesan patrimóniu mundiál Timor–Leste ne’ebé mak hetan rejistu ona iha United Nations Educational, Scientific and Cultural Organization (UNESCO) iha Paris.
Aleinde ne’e, ekipa hosi Sekretaria Estadu Arte no Kultura (SEAK) sei ba halo levantamentu dadus iha munisípiu Manatuto, Viqueque, Lospalos, Manufahi, Covalima inklui Rejiaun Administrativa Espesiál Oé-cusse Ambeno (RAEOA), hodi haree no verifika ezisténsia grupu soru tais.
Jornalista : Antónia Gusmão
Editora : Julia Chatarina
