VIQUEQUE, 09 marsu 2022 (TATOLI)-–Kandidatu Prezidente Repúblika (PR) hosi Partidu Demokratiku (PD) ba períodu 2022-2027, ho númeru sorteiu 16, Mariano Assanami Sabino, hateten, bainhira povu fó fiar ba nia, sei hadi’a ekonomia rai-laran ba bem estar povu.
“Bainhira ha’u eleitu ba Prezidente Repúblika, sei garante ekonomia ba bem estar povu. Prezidente sei halo tuir de’it Konstituisaun tanba ekonomia hakerek iha konstituisaun kona-ba setór públika, privada no setór kooperativa. Ha’u ba ukun mak sei haree progresu sira hodi benifisia ba povu no joven sira,” Kandidatu PR Assanami hateten liuhosi ninia diskursu iha kampaña públiku iha kampu futeból, Viqueque villa, kuarta ne’e.
Notísia relevante: Assanami sei promove diálogu ho Governu kria polítika moderniza F-FDTL
Ba kestaun ne’e, nia sei kolabora ho Governu atu haree ba setór produtivu sira iha rai-laran.
“Bainhira hetan oportunidade, ha’u sei halo polítika externa di’ak hodi halo diplomasia ekonomia, nune’e investidór sira bele mai investe iha ita-nia rain,” nia hato’o.
Nune’e mós, Assanami promete sei fó prioridade hodi dignifika joven sira, nune’e sira laiha tempu atu halo problema tanba laiha serbisu.
“Dalaruma ita prega joven hanesan bandidu, enkuantu sira hanesan futuru nasaun. Tanba ne’e, tempu ona joven mileniál sira moris di’ak no sai joven ne’ebé matenek,” Kandidatu PR ne’e enkoraja.
Aleinde ne’e, nia tau prioridade atu kria dame ba jerasaun tuan sira atu la bele insulta malu, tanba to’o ona tempu hamutuk atu dezenvolve nasaun ne’ebé prósperu ba moris di’ak povu.
Durante kampaña ne’ebé hahú iha tuku 13:00 to’o 16:20, hetan partisipasaun másimu hosi simpatizante PD no movimentu Loriku.
Atividade ne’e la’o ho hakmatek no hetan seguran hosi Polísia Nasionál Timor Leste (PNTL) no observasaun direta hosi observadór internasionál hosi Uniaun Europeia (UE) no supervizasaun hosi Komisaun Nasionál Eleisaun (CNE, sigla portugés).
Jornalista : Vitorino Lopes da Costa
Editora : Julia Chatarina
