DILI, 09 marsu 2022 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, relata katak parte ministériu prepara ona lista estudante atu vota iha Dili no submete ona ba Ministériu Administrasaun Estatál (MAE) hodi pasa ba órgaun eleitorál.
“Ita submete ona lista estudante universitáriu hosi munisípiu ne’ebé hakarak vota iha Dili ba MAE no agora iha ona Sekretariadu Tékniku Administrasaun Eleitorál (STAE), maibé sei falta lista estudante balun maka presiza haruka tan ba MAE,” Ministru Longuinhos informa ba Agênia TATOLI, iha Palásiu Governu, kuarta ne’e.
Notísia relevante: Ekipa resensiamentu eleitorál iha diáspora rejista votante 367
Maski nune’e, MESSK kontinua halo konfirmasaun ba lista estudante, nune’e bele kobre hotu.
“Ha’u halo kedan konfirmasaun ho MAE kona-ba lista estudante universitáriu no MAE rasik deklara katak sira submete ona ba STAE atu toma konsiderasaun, maibé hanesan lista ikus tanba prosesu atu simu tan lista foun taka ona. Ha’u husu posibilidade bele simu tan lista foun,” nia tenik.
Sei iha tan lista balun mak tarde iha MESSK, tanba ne’e ekipa tékniku sei ajusta tan númeru lista sira atu ohin bele submete ona.
Jornalista : Tomé Amado
Editora : Julia Chatarina
