iklan

NASIONÁL, EKONOMIA

2022: BTL, E.P sei implementa konstrusaun fíziku mellora bee-moos

2022: BTL, E.P sei implementa konstrusaun fíziku mellora bee-moos

Distribuisaun bee-moos. Imajen/BTL, E.P

DILI, 10 marsu 2022 (TATOLI)—Governu liuhosi Bee Timor-Leste, Empreza Públiku (BTL, I.P), iha tinan ne’e sei implementa konstrusaun fíziku ba melloramentu Sistema bee-moos iha munisípiu haat hanesan Baucau, Manufahi, Lautém no Viqueque.

Notísia Relevante: Governu rekoñese komunidade seidauk asesu bee-moos

Prezidente Konsellu Administrsaun Bee Timor-Leste, Empreza Públika (BTL, EP), Carlos Peloi dos Reis, hateten BTL, I.P halo ona akordu ho Banku Mundiál no Banku Dezenvolvimentu Aziátiku (ADB, sigla ingles) atu fó apoiu halo konstrusaun.

“Ita iha ona akordu formál ho Banku Mundiál ho ADB hodi finansia no hein atu implementa de’it iha munisípiu haat (4) ne’e hodi ita sei halo melloramentu ba sistema bee-moos iha tinan ne’e,” Carlos Peloi dos Reis hateten ba jornalista sira hafoin partisipa iha serimónia reflesaun krítiku ba implementasuan auditoria sosiál, iha salaun João II Comoro, Dili, kinta ne’e.

Nia informa, ba munisípiu Baucau nian aloka osan millaun $30 no hosi $30 ne’e osan $25 maihosi Banku Mundiál no $5 hosi Governu Timor-Leste rasik no ba munisípiu Viqueque, Lautém no Manufahi, ADB ho Governu Timor-Leste finansia ho nia montante hamutuk millaun $62.5.

Entretantu munisípiu Aileu, Ainaro, Liquiça, Ermera, Covalima no Bobonaro mak sei iha prosesu master plan no hein katak iha fulan-marsu tinan ne’e bele konklui ona.

“Ida-ne’e bele fasilita ami atu ami ne’ebé mak sai responsabilidade ba iha setór bee no saneamentu ne’e bele jere ho di’ak. Tanba hanesan ita hatene iha kapitál Dili ne’e ita lahatene kanalizasaun kanu bee nian iha rai ne’e to’o agora ita seidauk hatene. Bainhira kanu ku’ak no bee sai mai mak ita foin hatene katak bee ne’e iha. Maibé bainhira kanu ku’ak bee tun rai okos mak ita sei lahatene, tanba ho ida-ne’e mak ita hakarak halo planu hodi halo konstrusaun no halo melloramentu ba sistema bee-moos nian,” nia hateten.

Jornalista : Osória Marques

Editór      : Cancio Ximenes

iklan
iklan

Leave a Reply

iklan
error: Content is protected !!