COVALIMA, 10 marsu 2022 (TATOLI)–Diretór Eskola Bázika Central Ladi, Pedro Amarál, informa kampaña eleitorál ne’ebé durante ne’e kandidatu Prezidente Repúblika sira hala’o kampaña iha kampu futebol Ladi, Covalima, ne’e fó impaktu ba estudante iha Eskola Bázika Central Ladi hodi tuir prosesu aprendizajen ih aula laran.
“Durante hala’o kampaña eleitorál iha kampu Ladi, ha’u deskontente tanba barulu profesór sira esplika matéria ba estudante sira la rona no estduante sira laiha konsentrasaun atu simu matéria. Maibé, ita tenke simu realidade,” Diretór EBC Ladi ne’e hateten ba Agência Tatoli, iha eskola EBC Ladi, kinta ne’e
Durante kandidatu Prezidente Repúblika sira hala’o kampaña halo estudante sira konsentrasaun laiha atu simu matéria, maibé prosesu aprendizajen kontinua la’o bazea ba regra ne’ebé estabelese ona.
Diretór EBC Ladi ne’e rekomenda ba partidu politíku sira, ba futuru atu realiza kampaña tenke haree fatin ne’ebé labele fó impaktu ba estudante sira atu hala’o prosesu aprendizajen no mós movimentu transporte públiku.
“Ha’u-nia hanoin, tempu tuir mai husu lidér partidu politíku sira konvoka reuniaun hosi deside fatin ida-ne’ebé labele impede movimentu transporte públiku no prosesu aprendizajen hanesan mós agora,” nia dehan.
Profesór Matadalan Konselu Estudantil, Calistro de Jesus Fátima, rekomenda ba futuru atu realiza kampaña buka fatin ne’ebé labele fó impaktu ba estudante sira hala’o prosesu aprendizajen tanba movimentu ema no transporte prejudika tebes atividade aprendizajen.
Maske durante ne’e kampaña eleitorál hala’o iha kampu futebol Ladi no la’ós iha resintu eskola maibé Eskola Bázika Central Ladi besik iha kampu refere, tanba ne’e bainhira militante no simpatizante sira hakilar no toka múzika fó impaktu ba estudante sira labele hala’o prosesu aprendizajen.
“Ha’u sente preokupa tanba barullu halo estudante sira labele simu matéria ho di’ak no profesór halo esplikasaun ba matéria ne’e estudante sira la rona, nune’e ami buka meiu fahe de’it matéria ba estudante sira semana oin foin hala’o esplikasaun,” Calistro hateten.
Estudante iha Ensinu Báziku Centrál (EBC) Ladi hamutuk 939 no hosi númeru ne’e mane hamutuk 484 no feto hamutuk 455.
Jornalista : Celestina Teles
Editór : Cancio Ximenes
