DILI, 10 marsu 2022 (TATOLI)—Diretora Jerál Minisitériu Agrikultura no Peska (MAP), Maria Odete Gutteres, hateten, iha ona alvu katak tinan ne’e sei kolleta hare kulit iha rai ektare 38.000, ho projesaun foos tonelada 82.000.
“MAP iha esperansa boot kolleta hare ne’e bele la’o ho di’ak, maibé dezafiu ne’ebé hasoru mak udan boot, ne’ebé ikus mai estraga kanál irrigasaun,” Diretora Jerál hateten ba Agência TATOLI, iha salaun Aitarak-laran, kinta ne’e.
Notísia relevante: Sentru produsaun fini Triloka prepara hare tonelada hitu
Durante ne’e ekipa tékniku MAP sempre halo koordenasaun di’ak ho nível munisípiu sira atu halo implementasaun programa sira.
“Kolleta hare kulit refere ba époka dahuluk iha munisípiu hotu, eseptu parte Viqueque no área balun iha Manufahi, Kosta Súl, ne’ebé sentru sira halai natar ba époka daruak nian hahú fulan-juñu,” nia akresenta.
Antes ne’e, iha tinan 2021, MAP rejista área kultiva hare ektare 37.500 no iha posibilidade bele sa’e.
Jornalista : Arminda Fonseca
Editora : Julia Chatarina
