Akadémiku preokupa estudante mestradu barak ho idade avansadu
DILI, 11 marsu 2022 (TATOLI—Vise-Reitór ne’ebé trata asuntu Pos-Graduasaun Universidade Nasionál Timor-Lorosa’e (UNTL), Afonso de Almeida, hateten, durante ne’e parte universidade loke kuota hanesan ba ema hotu atu asesu ba programa mestradu, maibé kuaze ema ho idade avansadu mak aplika.
“Ita iha dadus, ema barak ne’ebé ita forma to’o ohin loron akaba ona kursu mestradu kuaze ho idade avansadu hotu ona. Rekursu sira ne’e sei fó impaktu ba futuru kuandu ita la tau importánsia ba joven sira,” Vise-Reitór informa iha Fundasaun Oriente, Bairro Formosa.
Notísia relevante: OJE 2022, FDCH prevee millaun $12 finansia programa haat
Akadémiku ne’e nota mós katak durante ne’e dosente lisensiatura barak mesak joven maibé to’o agora labele kontinua estudu atu foti kursu mestradu tanba laiha osan.
“Kuaze estudante ne’ebé kontinua kursu mestradu mesak katuas sira ne’ebé hetan ona serbisu iha Parlamentu Nasionál, Komisaun Funsaun Públika no ministériu sira,” nia akresenta.
Tuir Vise-Reitór UNTL, kestaun ne’e presiza tau atensaun tanba rekursu sira ne’ebé foti kursu mestradu sei lakon iha tinan 10 oin mai.
“Agora laiha ema ida maka preokupa ho joven sira, sé mak atu kontinua tan ba futuru destinu universidade nian. Ema sira agora akaba ona sira-nia kursu mestradu ne’e kuaze iha hotu osan, oinsá ho joven ne’ebé hakarak kontinua eskola maibé ekonomia la sufisiente, bainhira ita la prepara komesa agora hodi fó oportunidade ba joven sira, ba futuru bele mosu kauza ida maka lisensiatura hanorin fali lisensiatura sira seluk,” akadémiku ne’e preokupa.
Iha biban hanesan, Diretór Ezekutivu Fundu Dezenvolvimentu Kapitál Umanu (FDCH, sigla portugés), Cristóvão dos Reis, hateten, prontu apoiu Ministériu Ensinu Superiór Siénsia no Kultura (MESSK) halo ona akordu ruma liga ho kestaun ne’e.
“Ho polítika Governu maka sei haree asuntu ne’e, enkuantu parte tékniku FDCH nian hein de’it kuandu hetan ona aseitasaun fundu, prontu implementa,” nia tenik.
Tinan ne’e FDCH kontinua fó bolsa estudu ba joven hamutuk 2.000 atu kontinua estudu iha Instituisaun Ensinu Superiór públiku no privadu sira inklui bolsa estudu ba profesór hamutuk 42 iha Instituisaun Ensinu Superiór privadu atu kontinua estudu mestradu iha Portugal.
Nune’e mós, FDCH kontinua tulun joven na’in-25 kontinua programa mestradu no na’in-lima ba lisensiatura iha Portugal.
Enkuantu, Fundu Dezenvolvimentu tau prioridade ba joven sira hanesan dosente ne’ebé atu kontinua mestradu iha rai-laran ka rai-li’ur.
Jornalista : Tomé Amado
Editora : Julia Chatarina
